Amierykanskaja kampanija Transcend daje płaciežazdolnym klijentam mahčymaść stać drevami, pryčym klijent sam moža vybrać vid dreva.
Darečy, takaja ž pasłuha prapanujecca i dla katoŭ z sabakami: nabory dla pachavańnia chatnich žyvioł pradajucca asobna, praŭda z abmiežavańniem vahi ŭ 40 kh.
Kampanija zasnavanaja Mećju Kochmanam, pradprymalnikam, ekołaham i transcendentalistam. Transcendentalizm raźviŭsia ŭ kancy 1820-ch i 1830-ch hadach u Novaj Anhlii ŭ ZŠA. Heta fiłasofskaja płyń, asnoŭnymi elemientami jakoj źjaŭlajucca indyvidualizm i viera ŭ siłu asoby (źviazanaja najpierš z asabistaj svabodaj), indyjskija Viedy i fiłasofija, idealizm i vyklučnaja važnaść pryrody (pavažlivaje staŭleńnie i zachavańnie jaje).
Kampanija Transcend abiacaje, što kali vy pamracie, to (za nienazvanuju płatu) budziecie pachavanyja ŭ łožku z draŭnianaj ščepki abo siena, u dźviuch hadzinach za miežami asnoŭnaha miehapolisa pa vašym vybary i prykładna ŭ mietry pad płastom hleby, uzbahačanaj mikaryzaj (heta simbijoz hrybnoha miceliju z karaniami vyšejšych raślin). Takim čynam vaša cieła, jakoje raskładajecca, budzie karmić hryby i zabiaśpiečvać pažyŭnymi rečyvami karani maładoha dreva, jakoje vy sami zmožacie abrać (na hety momant jość 10 vidaŭ na vybar), pieraplatajučysia taksama ź sietkami miceliju i karaniami inšych dreŭ, jakija buduć raści vakoł vas.
Tak vy staniecie adnym cełym z drevam i ŭsim navakolnym asiarodździem, a ziamla, u jakoj vy pachavanyja, budzie naviečna abaronienaja ad dalejšaha raźvićcia, abiacaje kampanija. Vierahodna, heta niebłahi šaniec (pierad tym, jak stać drevam i paznajomicca ź mikaryzaj bližej) prosta źmianić svajo ŭsprymańnie śmierci i pry hetym dapamahčy vyratavać płanietu.
Transcend taksama abiacaje pasadzić 1000 dreŭ ad vašaha imia, kali vy pamracie, dziakujučy partniorstvu z One Tree Planted (hienieralny dyrektar Met Chił źjaŭlajecca adnym z daradcaŭ Transcend).
U kamientaryi dla Inverse Kochman kaža, što jaho ambicyi adnosna Transcend jašče bolš surjoznyja: jon skancentravany na pryciahnieńni ludziej u taki biźnies, jaki nie prosta pachavaje ich praz 70 hadoŭ, ale i «zbuduje ź imi adnosiny na ŭsio astatniaje žyćcio, dapamahajučy im hodna stareć jak spažyŭcam z ekałahičnym myśleńniem».
Pa danych New Hampshire Funeral Resources and Education, u ZŠA ciapier naličvajecca 351 zialony ćvintar. Dvaccać ź ich źjaŭlajucca pryrodaachoŭnymi mohiłkami, što aznačaje, što jany (jak i Transcend) majuć padvojnuju misiju: zabiaśpiečvać naturalnyja pachavańni i abaranić ziamlu ad zabudovy.
Na veb-sajcie Transcend nie paviedamlajecca, kolki pieršapačatkova buduć kaštavać braniravańni hajoŭ, jakija stanuć dastupnymi paźniej u hetym hodzie. U toj ža čas, paviedamlajecca, što «adzinaja płata Tree Burial składaje 1/2 cany tradycyjnaha pachavańnia», adnak u sakaviku 2023 hoda Transcend raspradała svaje pakiety premium-kłasu Future Tree pa 8500$ (jany abiacajuć pakupnikam «dostup da finansavych i prefierencyjnych pieravah» šlacham fiksacyi indyvidualnaj cany, a taksama 100 drevaŭ, pasadžanych «nieadkładna» na «terytoryjach ź vialikaj patrebaj»).
Prablema tryljona dreŭ
Niahledziačy na toje, što mnohija zialonyja mohiłki sapraŭdy prapanujuć pasadzić dreva niepasredna na mahile, nie ŭsie ŭ halinie zhodnyja z ekałahičnaściu hetaj praktyki. Maładym drevam, jakija rastuć, patrebna dastatkova prastory (u ideale, nie mienš za 4,5 m²).
A što z dadatkovaj tysiačaj dreŭ, jakija Transcend płanuje vysadžvać za kožnuju zamovu? Veb-sajt kampanii nieadnarazova adznačaje patencyjał kampanii ŭ dasiahnieńni žadanaj ličby ŭ 1 tryljon dreŭ — hetaja ličba była ŭpieršyniu prapanavanaja ŭ daśledavańni 2019 hoda jak toje, što moža dapamahčy adnaŭleńniu hłabalnaha lasnoha pokryva na płaniecie i stać vyrašalnym u baraćbie sa źmianieńniem klimatu.
Ale mnohija ekśpierty pa klimacie i lasnoj haspadarcy nie zhodnyja sa śćviardžeńniem, što pasadka 1 tryljona dreŭ źjaŭlajecca hodnym rašeńniem u zmahańni z klimatyčnym kryzisam. Daśledčyki kažuć, što najbolš ekanamična efiektyŭnym klimatyčnym rašeńniem źjaŭlajecca nie vysadka novych drevaŭ, a zachavańnie ŭžo isnujučych cełych ekasistem, a taksama praduchileńnie ich razbureńnia. Daśledčyki kažuć, što nasadžeńnie dreŭ na łuhach, chmyźniakach i tarfianikach moža źniščać bijaraznastajnaść, a lasy mohuć adnaŭlacca na vysiečanych ziemlach naturalnym šlacham, kali tolki čałaviek nie budzie hetamu pieraškadžać.
Jak i ŭ vypadku z pasadkaj adnaho dreva nad adnoj mahiłaj, pytańni masavaj pasadki dreŭ šmat u čym zaležać ad vykanańnia. Arhanizacyi, jakija raspracoŭvajuć prajekty, začastuju zasnavanyja na niedaśviedčanaj palitycy, nie vysadžvajuć adpaviednuju raślinnaść, sadžajuć drevy tolki dla taho, kab znoŭ ich vysiekčy dla karparatyŭnaha vykarystańnia, i naŭmysna zasiarodžvajucca na pasadcy dreŭ u škodu inšym namahańniam pa skaračeńni vykidaŭ vuhlakisłaha hazu.
Tamu stać drevam paśla śmierci — cudoŭnaja ideja, jakaja, adnak, pavinna realizoŭvacca najpierš na asnovie navukovych danych, a nie sychodziačy z tendencyj i zakonaŭ rynku.
I ŭsio ž niezaležna ad taho, ci mietady Transcend sapraŭdy ekałahična čystyja, fakt, što tradycyjnyja pachavańni ŭ mnohich kulturach štohod pryvodziać da vykidu ŭ navakolnaje asiarodździe ahromnistych kolkaściej mietału, bietonu, vadkaści dla balzamavańnia i inšych rečyvaŭ. Tamu kožny maje sam abirać, jaki śled jon zachoča pakinuć paśla siabie na płaniecie.
«Vyskačyć na vulicu ŭ karotkich spadničkach — heta vy mahli. I ŭsich hvałtavali tam». Łukašenka ŭspomniŭ kinošnikam 2020-y i zaklikaŭ spynicca12
Kamientary