Supracoŭnica «Biełpošty» skrała 490 tysiač rubloŭ. Pryčym jana pracavała niapoŭny miesiac
Babrujskim mižrajonnym adździełam Śledčaha kamiteta rasśledujecca kryminalnaja sprava ab kradziažy šlacham złoŭžyvańnia słužbovymi paŭnamoctvami ŭ asabliva bujnym pamiery.
U krasaviku 2023 hoda 30-hadovaja žančyna była časova pryznačanaja na pasadu načalnicy adździaleńnia paštovaj suviazi, paviedamlaje SK.
Skarystaŭšysia adsutnaściu asnoŭnaha kiraŭnika i raźličvajučy, što ŭ vychadnyja dni słužba ŭnutranaha kantrolu nie adsočvaje ruch hrašovych srodkaŭ, žančyna na praciahu niekalkich dzion pieraličvała na svaju bankaŭskuju kartu hrošy, jakija naležać pradpryjemstvu. U vyniku čaho pryčyniła škodu na sumu kala 490 tysiač rubloŭ.
Padčas dopytu jana raspaviała śledčamu, što hrošy pieraličvała na biržu, dzie hulała z kanca sakavika, adnak potym «syšła ŭ minus». Kab adnavić svoj rejtynh, žančyna vyrašyła prakrucić afioru i skarystacca hrašyma pradpryjemstva, na jakim praciahły čas pracavała.
Majučy dostup da raźlikovaha rachunku pradpryjemstva, žančyna ažyćciaviła niekalki hrašovych pieravodaŭ na svaju bankaŭskuju kartu, što i było vyjaŭlena kiraŭnictvam pradpryjemstva. Jany adrazu ž paviedamili pra zdareńnie ŭ milicyju.
U ciapierašni čas 30-hadovaj žycharcy Babrujska pradjaŭlenaje abvinavačvańnie pa č. 4 art. 210 (kradziež šlacham złoŭžyvańnia słužbovymi paŭnamoctvami, ździejśnieny ŭ asabliva bujnym pamiery).
Dziaŭčyna źmieščanaja pad vartu. Na jaje majomaść nakładzieny aryšt.
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak44
Kamientary