Kultavy minski kafeteryj «Centralny» stanie asobnaj kampanijaj
Kultavy kafieteryj, raźmieščany na pieršym paviersie ŭniviersama «Centralny», stanie asobnaj kampanijaj, vynikaje z bazy źviestak adzinaha partała finansavaha rynku, paviedamlaje «Sputnik».
ZAT «Univiersam Centralny» rearhanizavałasia i vyłučyła novuju jurydyčnuju asobu — TAA «Centralnaje kafe». Jana ŭžo ŭniesienaja ŭ adziny dziaržrehistratar IP i jurydyčnych asob. Ale pakul u Handlovym rejestry nie adlustravana, što hetaja firma budzie kiravać znakamitym kafieteryjem.
Vyłučeńnie adbyvajecca na fonie prablem u ZAT. Raniej jano było afilavanaje ź sietkaj kram «Damašni», jakaja začyniłasia ŭ 2021 hodzie z-za daŭhoŭ. Paśla hetaha pamiaškańnie ŭniviersama «Centralny» zdali ŭ arendu sietcy «Jeŭraopt».
Ale kultavym kafieteryjem praciahnuła kiravać ZAT «Univiersam Centralny». U apošni čas u kampanii nie było strat. Naprykład, pa vynikach minułaha hoda čysty prybytak skłaŭ 110 tys. rubloŭ, a ŭ pieršym kvartale ciapierašniaha — 283 tys.
Adnak na «Centralnym» niamała paručycielstvaŭ na karyść byłoj sietki «Damašni». Kampanija paručałasia jak pa kredytnaj linii Biełhazprambanka, tak i pa ablihacyjach. Kali «Damašni» začyniali, «Centralny» z dapamohaj dadatkovaha pahadnieńnia abmiežavaŭ svajo paručalnictva pa ablihacyjach kampanii «Hama Rytejł», jakaja była adnoj z asnoŭnych jurydyčnych asob «Damašniaha».
Praz heta niekatoryja trymalniki kaštoŭnych papier nie zmahli atrymać hrošy ad «Centralnaha». Niadaŭna Minfin paviedamiŭ, što ciapier jany znoŭ mohuć źviartacca, bo dadatkovaje pahadnieńnie skasavanaje pavodle suda. Mienavita nieŭzabavie paśla hetaha paviedamleńnia była stvoranaja novaja kampanija TAA «Centralnaje kafe».
Pry hetym pamiaškańnie ŭniviersama pa-raniejšamu vystaŭlenaje na prodaž. Abjava pra heta niekalki hadoŭ visić na sajcie «NP-Servis» (košt — blizu 7 młn dalaraŭ biez PDV). Pavodle apošnich źviestak, kampanija źviazanaja z «Centralnym» praz saŭładalnika Ivana Bierazoŭskaha.
Ustanova na pieršym paviersie ŭniviersama «Centralny» ŭ Minsku isnuje amal 70 hadoŭ. Jaje adkryli ŭ 1954 hodzie, paśla ramontaŭ u interjery da hetaha času zachavanyja kalarovyja bareljefy. Heta miesca davoli papularnaje z-za mahčymaści lehalna spažyć niedarahoje śpirtnoje ŭ centry horada, a taksama z-za kandytarskich vyrabaŭ.
Naprykład, tolki «Centralny» maje prava vyrablać tort «Mara» pa asablivaj receptury. Bolš za toje, kampanija niekalki hadoŭ tamu zapatentavała hetuju nazvu.
Śpiavačku Meryjem Hierasimienka na praciahu dvuch hadoŭ źbivaŭ muž43
Śpiavačku Meryjem Hierasimienka na praciahu dvuch hadoŭ źbivaŭ muž
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary