Eks-mera Jekaciarynburha Rojzmana aštrafavali pa spravie dyskredytacyi armii. Sankcyja praduhledžvała da piaci hadoŭ turmy
Za jaho zastupiłasia navat Ała Puhačova.
Kastryčnicki sud Jekaciarynburha pryznačyŭ byłomu meru horada Jaŭhienu Rojzmanu (abvieščany rasijskimi ŭładami «zamiežnym ahientam») štraf pamieram 260 tysiač rasijskich rubloŭ (kala 3250 dalaraŭ) pavodle spravy ab «dyskredytacyi armii», piša Bi-bi-si.
Rojzmana asudzili pa č. 1 art. 280.3 KK RF (publičnyja dziejańni, nakiravanyja na dyskredytacyju vykarystańnia Uzbrojenych sił), maksimalnaje pakarańnie pa jakoj — pazbaŭleńnie voli na termin da piaci hadoŭ.
Napiaredadni prakuror paprasiŭ pryznačyć Rojzmanu adnosna miakkaje pakarańnie — štraf 260 tysiač rubloŭ. Taki štraf i pryznačyŭ sud.
Rojzman, kamientujučy pakarańnie, jakoje zapytvaŭ prakuror, skazaŭ: «Usie razumiejuć, što ja ni ŭ čym nie vinavaty i što ja ničoha drennaha nie zrabiŭ».
Abarona Rojzmana prasiła sud apraŭdać jaho. Jak padkreślivaŭ advakat Uładzisłaŭ Idamžapaŭ, abvinavačańnie parušaje zamacavanuju ŭ Kanstytucyi svabodu dumki i słova.
Kryminalnuju spravu suprać papularnaha jekaciarynburhskaha palityka raspačali ŭ žniŭni minułaha hoda. Nahodaj staŭ vystup u YouTube ŭ lipieni, u jakim Rojzman vykazvaŭsia pra vajnu va Ukrainie.
Abirajučy mieru strymańnia, sud nie staŭ adpraŭlać jaho ŭ SIZA, zabaraniŭšy tolki peŭnyja dziejańni: naviedvać publičnyja mierapryjemstvy i karystacca internetam.
Sudovy praces pa spravie Rojzmana pačaŭsia ŭ kancy krasavika.
Jak pisała jekaciarynburhskaje vydańnie It's My City, zhodna z abvinavaŭčym zaklučeńniem, Rojzman «dyskredytavaŭ» rasijskuju armiju siarod inšaha tym, što nazvaŭ «śpiecapieracyju» va Ukrainie vajnoj, a simvał Z — «zihaj».
U čaćvier u sudzie dapytvali śviedak. Sam Rojzman ad dačy pakazańniaŭ admoviŭsia. «Z vašaha dazvołu — nie budu», — skazaŭ jon sudździ. Vystupajučy z apošnim słovam, Rojzman padziakavaŭ i pieraličyŭ piśmieńnikaŭ, muzykaŭ i navukoŭcaŭ, jakija vystupili ŭ jaho padtrymku.
U čaćvier sudździa dałučyŭ da spravy niekalki charaktarystyk, jakija dali na Rojzmana viadomyja ludzi, ale admoviŭsia pry hetym dałučać zvarot śpiavački Ały Puhačovaj. Sudździa zajaviŭ, što zvarot Puhačovaj źjaŭlajecca niepracesualnym (nie aformleny pa patrabavańniach KPK), a Rojzman adznačyŭ, što pastavić jaho «ŭ ramačku i na ścianu paviesić».
Rojzman — papularny ŭ Śviardłoŭskaj vobłaści palityk, były kiraŭnik Jekaciarynburha (2013—2018 hady) i deputat Dziarždumy (2003—2007 hady).
Paśla ŭvarvańnia Rasii va Ukrainu Rojzman nie staŭ pakidać krainu, pry hetym vystupaŭ suprać bajavych dziejańniaŭ i krytykavaŭ rasijskija ŭłady.
Kamientary