Most praź Śvisłač kala płoščy Pieramohi adkryjuć paśla ramontu da kanca žniŭnia
Most praz raku Śvisłač kala płoščy Pieramohi na praśpiekcie Niezaležnaści ŭ Minsku płanujuć adkryć dla ruchu da pačatku vosieni. Ramontnyja raboty pavinny zaviaršycca 28 žniŭnia. Pra heta paviedamiŭ staršynia Minharvykankama Uładzimir Kucharaŭ u efiry telekanała ANT.
Pavodle słoŭ čynoŭnika, abmiežavańni ruchu stvarajuć niazručnaści dla minčukoŭ, ale raboty śpiecyjalna zapłanavali na letni pieryjad, kali mnohija ludzi znachodziacca ŭ adpačynkach, a školniki i studenty — na kanikułach. Inšaha zručnaha času dla takoha ramontu, pa słovach mera, nie było.
Kucharaŭ padkreśliŭ, što hałoŭnaj pryčynaj praviadzieńnia rabot źjaŭlajecca biaśpieka ludziej. Jon paabiacaŭ, što paśla zaviaršeńnia ramontu horad da pačatku vosieni i novaha navučalnaha hoda vierniecca da zvyčajnaj arhanizacyi ruchu.
Most kala płoščy Pieramohi zakryli na ramont 6 lipienia. U ramkach rabot staroje darožnaje pakryćcio pavinny byli demantavać, adnavić apornuju zdolnaść manalitnaj plity i abnavić hidraizalacyju puciepravoda.
Akramia hetaha, ramont uklučaje abnaŭleńnie piešachodnych zon i vieładarožak, zamienu parenčaŭ, sistemy aśviatleńnia i inžyniernych kamunikacyj.
Pry hetym źniešni vyhlad mosta istotna źmianiać nie płanujecca: kolkaść pałos dla ruchu i šyrynia tratuaraŭ pavinny zastacca raniejšymi.
Dzieviać čałaviek pamierli ŭ Breście i Minsku — usim im uvodzili adnyja i tyja ž leki. U preparacie znajšli bakteryi5
Kamientary