Stvaryli kamisiju dla pravierki vynikaŭ centralizavanaha ekzamienu i abiacajuć pamianiać sistemu
Ministr adukacyi Andrej Ivaniec, jaki jašče ŭčora ŭsie sihnały ab parušeńniach pry praviadzieńni centralizavanaha ekzamienu pa biełaruskaj i ruskaj movach nazyvaŭ fejkami, paviedamiŭ pra sfarmavańnie mižviedamasnaj kamisii dla pravierki karektnaści apracoŭki jaho vynikaŭ.
Pavodle Ivanca, kamisija składajecca «z matematykaŭ, infarmatykaŭ, śpiecyjalistaŭ u halinie statystyčnaj apracoŭki vynikaŭ, našych najlepšych navučalnych ustanoŭ nie tolki vyšejšaj adukacyi, ale i Respublikanskaha instytuta vyšejšaj škoły, inšych śpiecyjalistaŭ».
Usie hetyja ludzi musiać «u samyja karotkija terminy» pravieści kompleksnuju pravierku karektnaści raźlikaŭ, zroblenych Respublikanskim instytutam kantrolu viedaŭ.
U vypadku vyjaŭleńnia pamyłak ministr abiacaje pryniać «usie nieabchodnyja miery pa ich likvidacyi».
Źmiena pazicyi Andreja Ivanca niepasredna źviazanaja z tym, što prablemaj zacikaviŭsia Łukašenka, abvinavaciŭšy va ŭsim kampjutary.
Ciapier, pavodle ministra:
«U Ministerstvie adukacyi jość prapanova, kab całkam adyści ad pieravodu pieršasnych bałaŭ u testavyja. My bačym mahčymaść stvareńnia takoj sistemy, kali kožnaje zadańnie budzie mieć kankretnuju vahu da pačatku praviadzieńnia ekzamienu. I kožny vypusknik budzie razumieć, što, rašyŭšy kankretnuju zadaču, jon moža atrymać z 100 bałaŭ 2, 5 ci 10 u zaležnaści ad składanaści samoj zadačy».
I heta nibyta «budzie absalutna prazrystaja sistema, jakaja nie budzie patrabavać nijakich techničnych instrumientaryjaŭ pa pierakładzie pieršasnaha bała ŭ testavy».
Ciapier čytajuć
Što za 17-hadovy startapier, jaki vyliŭ cebar chłuśni na Libiera na radaść biełaruskim śpiecsłužbam7
Kamientary