Na «Biełšynu» znoŭ nakłali sankcyi, jakija źniali dva hady tamu
Babrujskaje pradpryjemstva «Biełšyna» znoŭ uklučyli ŭ sankcyjny śpis Jeŭrapiejskaha Sajuza. Takoje rašeńnie pryniała Rada ES, i jano apublikavana ŭ aficyjnym vydańni Jeŭrasajuza.
Raniej pradpryjemstva ŭžo znachodziłasia pad sankcyjami, ale amal dva hady tamu sankcyi suprać zavoda byli admienienyja.
Pradpryjemstva trapiła pad abmiežavańni 2 śniežnia 2021 hoda, adnak u sakaviku 2024‑ha zdoleła paśpiachova asprečyć hetuju pastanovu ŭ Jeŭrapiejskim sudzie. Tady «Biełšynu», jak i ciapier, abvinavačvali ŭ padtrymcy i finansavańni biełaruskaj dziaržavy. Kampanija ž davodziła, što jašče da ŭviadzieńnia sankcyj pracavała sa stratami i nie mahła vypłačvać dyvidendy ŭ biudžet. Što stała padstavaj dla novaha rašeńnia, pakul dakładna nie tłumačycca.
Akramia «Biełšyny», u sankcyjnym śpisie ES zastajucca takija bujnyja biełaruskija pradpryjemstvy, jak «Biełaruśkalij», MZKT i «Hrodna Azot». Paŭtorna tudy taksama ŭklučyli «Biełtechekspart», «140‑y ramontny zavod» i filijał «Hrodna Azota» — «Zavod Chimvałakno».
Akramia taho, 26 lutaha Jeŭrasajuz uvioŭ sankcyi suprać 54 pradstaŭnikoŭ biełaruskich siłavych struktur. Pad abmiežavańni trapili kamandziry i aficery roznych śpiecpadraździaleńniaŭ. U dakumiencie adznačajecca, što sankcyi ŭviedzienyja ŭ suviazi z padtrymkaj Rasii ŭ jaje dziejańniach suprać Ukrainy, a taksama na padstavie abvinavačańniaŭ u parušeńniach pravoŭ čałavieka.
U sankcyjny śpis taksama ŭklučanyja premjer-ministr Biełarusi Alaksandr Turčyn, staršynia Pałaty pradstaŭnikoŭ Ihar Sierhiejenka, ministr zamiežnych spraŭ Maksim Ryžankoŭ.
Z «Biełšyny» źniali jeŭrapiejskija sankcyi, ale jana praciahvaje pracavać na rasijskuju vajennuju mašynu
Šrajbman z kalehami prapanavali pakrokavy płan deeskałacyi adnosin Biełarusi i ES
«Nichto z kiraŭnictva ź im nie spračajecca». Jakija byłyja siłaviki absieli kiraŭničyja pasady bujnych biełaruskich pradpryjemstvaŭ
Kamientary