«Uzbrojeny bunt». U Biełarusi chočuć uvieści novyja padstavy dla ŭviadzieńnia nadzvyčajnaha i vajennaha stanovišča
Parłamient źbirajecca razhledzieć źmieny ŭ zakony ab vajennym i nadzvyčajnym stanoviščy. Vyhladaje, što praŭki vyklikanyja aściarohami ŭładaŭ nakont biełaruskich dobraachvotnikaŭ, što vajujuć va Ukrainie, «Bajpoła» i militarnych farmavańniaŭ typu «Paspalitaha rušeńnia».
Zakonaprajekt apublikavany na Nacyjanalnym pravavym partale.
Spačatku pra zakon «Ab vajennym stanoviščy».
Kali raniej pahrozaj ličylisia varožyja dziejańni inšaj dziaržavy ci kaalicyi dziaržaŭ, to ciapier prapanujuć dadać zhadku i pra «ekstremisckija hrupy i arhanizacyi».
U zakon prapanujuć dadać takija vyznačeńni, što ličycca vajennaj pahrozaj:
- dziejańni inšaj dziaržavy (kaalicyi dziaržaŭ), jakaja dazvalaje (jakija dazvalajuć) vykarystoŭvać svaju terytoryju treciaj dziaržavie (trecim dziaržavam), ekstremisckim hrupam i arhanizacyjam dla napadu na Respubliku Biełaruś;
- zasyłka inšaj dziaržavaj (kaalicyjaj dziaržaŭ) abo ad imia inšaj dziaržavy (kaalicyi dziaržaŭ), ekstremisckimi hrupami i arhanizacyjami, raźmieščanymi na terytoryi inšaj dziaržavy (inšych dziaržaŭ), na terytoryju Respubliki Biełaruś uzbrojenych band (hrup), irehularnych sił, najmitaŭ abo padraździaleńniaŭ rehularnych vojskaŭ, jakija prymianiajuć uzbrojenuju siłu suprać Respubliki Biełaruś.
Źbirajucca dadać praŭku, što ŭ vypadku biaździejańnia prezidenta vajennaje stanovišča moža ŭvieści Usiebiełaruski narodny schod.
U zakon «Ab nadzvyčajnym stanoviščy» taksama prapanujuć unieści źmieny. Kali raniej adnoj z padstaŭ dla jaho ŭviadzieńnia byli biesparadki, to ciapier hetych punkt chočuć pašyryć i dadać uzbrojeny bunt.
Hučać jon budzie tak: «Sproby hvałtoŭnaha źmianieńnia kanstytucyjnaha ładu, zachopu abo prysvajeńnia dziaržaŭnaj ułady, uzbrojenaha buntu, masavych i inšych biesparadkaŭ, jakija supravadžajucca hvałtam albo pahrozaj hvałtu z boku hrupy asob i arhanizacyj, u vyniku jakich uźnikaje niebiaśpieka žyćciu i zdaroŭju ludziej, terytaryjalnaj cełasnaści i isnavańniu dziaržavy».
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam14
Kamientary