Mižnarodnaja arhanizacyja pracy padtrymała rezalucyju ab pierahladzie adnosin ź Biełaruśsiu
Mižnarodnaja arhanizacyja pracy padtrymała rezalucyju ab prymianieńni ŭ dačynieńni da Biełarusi artykuła 33 statuta arhanizacyi. Rašeńnie było pryniata na 111-j Mižnarodnaj kanfierencyi pracy ŭ Ženievie.
«Za» rezalucyju prahałasavaŭ 301 čałaviek, «suprać» — 54, 108 čałaviek ustrymalisia.
Artykuł 33 statuta MAP abviaščaje: «U vypadku, kali jaki-niebudź člen arhanizacyi nie vykanaje va ŭstanoŭleny termin rekamiendacyi, kali takija majucca, što źmiaščajucca ŭ dakładzie Kamisii pa rasśledavańniach abo ŭ rašeńni Mižnarodnaha suda, Administracyjnaja rada moža rekamiendavać kanfierencyi takija dziejańni, jakija jana paličyć metazhodnymi dla zabieśpiačeńnia vykanańnia hetych rekamiendacyj».
Rezalucyja prapanuje ŭdzielnikam MAP pierahledzieć svaje adnosiny z uradam Biełarusi.
Mižnarodnaja arhanizacyja pracy (MAP) — śpiecyjalizavanaja ŭstanova AAN, mižnarodnaja arhanizacyja, jakaja zajmajecca pytańniami rehulavańnia pracoŭnych adnosin. Na siońniašni dzień udzielnikami MAP źjaŭlajecca 187 dziaržaŭ.
Pryniataje rašeńnie moža mieć vynikam padtrymku z boku MAP vyklučnych ekanamičnych sankcyj za nievykanańnie rekamiendacyj. Siarod inšaha heta tearetyčna moža vylicca ŭ błakavańnie luboha ekspartu i faktyčnaha ŭstanaŭleńnia ekanamičnaj błakady ŭ dačynieńni da krainy, jakaja parušaje pravy rabotnikaŭ.
Jak i lubaja inšaja mižnarodnaja arhanizacyja, tym bolš pad ehidaj AAN, MAP zusim nie schilnaja da pryncypovych i rašučych dziejańniaŭ adnosna dyktatarskich režymaŭ i navat u samych bieznadziejnych vypadkach sprabuje šukać kampramisy i iści na sastupki. Dla pryniaćcia takoj rezalucyi treba pierastupić peŭnyja čyrvonyja linii. U vypadku biełaruskaha režymu takimi stała rasprava nad niezaležnymi prafsajuzami, jakija ciapier u Biełarusi faktyčna likvidavanyja, a ich lidary atrymali vialikija turemnyja terminy, niahledziačy navat na svaju dastatkova pamiarkoŭnuju pazicyju va ŭmovach palityčnaha kryzisu ŭ krainie.
Kamientary