«Hramadski dziejač, hramadzianin Respubliki Biełaruś, jabaćka». Volha Bondarava pajšła ŭ ataku na načalnika abłasnoj milicyi
Haradzienskaja prapahandystka Volha Bondarava 15 červienia apublikavała ŭ svaim telehram-kanale «aficyjny zvarot» da načalnika abłasnoj milicyi Dźmitryja Raziankova. U svaim liście jana abvinavaciła milicejskaha čynoŭnika ŭ paklopie i prapanavała sustrecca asabista, kab toj nie raspaŭsiudžvaŭ pra jaje «biespadstaŭnyja čutki».
Bondaravu abraziła toje, što načalnik abłasnoj milicyi, na dumku prapahandystki, biespadstaŭna abvinavaciŭ jaje «ŭ arhanizacyi dziejańniaŭ, jakija hruba parušajuć hramadski paradak i jakija skiravanyja na zachop ułady siłavym šlacham, a taksama ŭ pracy na zamiežnyja śpiecsłužby».
Asabliva jaje začapiła toje, što milicejski načalnik niedzie nazvaŭ jaje «druhim Cichanoŭskim», abvinavaciŭ u abrazie hrodzienskich vysokich čynoŭnikaŭ Juryja Karajeva i Uładzimira Karanika i skazaŭ, što praz takich, jak jana, «adbyŭsia dziaržaŭny pieravarot».
Taksama Bondarava abvinavaciła Raziankova ŭ hrubaści, adznačyŭšy, što «adčuvaje ispanski soram za takija pavodziny biełaruskaha aficera vyšejšaha ranhu». Kali ž milicyja maje da jaje pretenzii, to chaj, maŭlaŭ, vystavić «aficyjnyja abvinavačańni».
U kancy svajho zvarotu, pieraličyŭšy zaadno ŭsie svaje zasłuhi pierad režymam, prapahandystka prapanavała Raziankovu sustrecca asabista, kab «rasstavić usie kropki nad «i» i bolš nie viartacca da hetaha pytańnia».
A ŭ kancy padpisałasia: «Volha Bondarava, hramadski dziejač, hramadzianin Respubliki Biełaruś, jabaćka».
Kamientary
Ohovorka po Friejdu?