Volha Bondarava zrabiła «Drazdoŭ» «Dziatłami» za pieśniu na biełaruskaj movie, jakuju śpiavali pry Łukašenku
Nie vyklučana, što da siońniašniaha zatrymańnia byłoj staršyni Tavarystva biełaruskaj movy i eks-deputatki Pałaty pradstaŭnikoŭ Aleny Anisim spryčyniłasia praz danos sumnaviadomaja hrodzienskaja aktyvistka Volha Bondarava.
Akurat siońnia ŭ telehram-kanale Bondaravaj źjaviŭsia skrynšot pasta Aleny Anisim u fejsbuku ad 22 studzienia hetaha hoda. Anisim u im napisała:
«Učora prajechałasia ja na baćkoŭskuju siadzibu, a ŭviečary trapiłasia hetaje videa. Suhučna na ŭsie sto!»
Videa, na jakoje spasyłajecca Anisim, — vystup u Baranavičach hurta «Drazdy» ź pieśniaj «Chata baćkoŭ».
«Anisim, Diatły i chata baćkou. Zmaharstvo taki rulit», — padpisała skrynšot Bondarava, znarok hrebliva pierakručvajučy nazvu hurta i kalečačy biełaruskuju movu.
Pry hetym asablivuju pikantnaść situacyi nadaje toje, što taja ž «Chata baćkoŭ» hurta «Drazdy» rehularna vykonvajecca na praŭładnych mierapryjemstvach. Praŭładny rupar «SB. Biełaruś siehodnia» letaś pisaŭ pra jaje z nahody kancerta da prydumanaha režymam Dnia narodnaha adzinstva:
«Prymusiŭ śpiavać «Minsk-Arenu» i hurt «Drazdy». Ich «Chata baćkoŭ» usiaho za hod isnavańnia stała adnoj ź lubimych jak dla samich muzykaŭ, tak i dla ŭsich biełarusaŭ. Vital Karpanaŭ pryznajecca, što paśla vychadu pieśni atrymaŭ vielizarnuju kolkaść vodhukaŭ i paviedamleńniaŭ z udziačnaściu:
«My vielmi radyja, što «Chata baćkoŭ» znajšła vodhuk u sercach tysiač biełarusaŭ. Za toj hod, jaki žyvie naša pieśnia, my bačyli vočy hledačoŭ, ślozy i ŭśmieški na ich tvarach. I heta absalutnaja ščaście dla luboha artysta».
A voś jak heta vyhladała. Na pieršych siekundach pakazvajuć vip-łožu z Alaksandram Łukašenkam.
Adziny «kryminał», jaki niasie hetaja pieśnia dla Volhi Bondaravaj, — tolki toje, što jana na biełaruskaj movie. Nijakaj choć by prychavanaj apazicyjnaści tam niama ani znaku.
Za dziejnaściu Volhi Bondaravaj, mierkavana, stajać vysokapastaŭlenyja čynoŭniki, jakija joj spryjajuć.
Ciapier čytajuć
Chto taja Alina, ź jakoj Łukašenka tancavaŭ hetym razam na navahodnim bali23
Kamientary