«Biełarusy, jakija doma, čakajcie nas». Były roznarabočy z Łuninieččyny vajuje za Rasiju — uziaŭ pazyŭny «Bulba»

Pa infarmacyi «Našaj Nivy» i «Kibierpartyzanaŭ», hetaha mužčynu, chutčej za ŭsio, kličuć Alaksandr Ramančuk. Jamu 40 hadoŭ, naradziŭsia ŭ vioscy Łobča, jakaja znachodzicca ŭ Łuninieckim rajonie. Vidać, ź dziacinstva mieŭ prablemy sa zdaroŭjem: z 12 da 15 hadoŭ Ramančuk vučyŭsia ŭ Malečskaj sanatornaj škole-internacie, kudy nakiroŭvajuć dziaciej z prablemami sa zdaroŭjem, u pryvatnaści, z zachvorvańniami ščytapadobnaj załozy, sardečna-sasudzistaj sistemy, orhanaŭ dychańnia i stravavańnia.

Z 2001 pa 2002 hod Ramančuk słužyŭ u vojsku, u čaści №1463 u Dziaržynsku, jakaja zajmajecca materyjalna-techničnym zabieśpiačeńniem Pamiežnaj słužby.

Pavialičyć

Pa źviestkach «Kibierpartyzanaŭ», žonki ŭ mužčyny niama. Pracavaŭ jon roznarabočym i na budoŭli. U 2010-ja pajechaŭ u Rasiju. U 2017 hodzie žyŭ u Padmaskoŭi i nidzie nie pracavaŭ. U 2019-m — u Maskvie i maje zapazyčanaść pa niejkim zajmie ŭ prykładna 50 dalaraŭ, suprać jaho navat pačynali vykanaŭčuju vytvorčaść.

Jak napisaŭ adzin z praŭładnych kanałaŭ, mužčyna maje pazyŭny «Bulba», vajavaŭ na baku Rasii ŭ bataljonie «Sparta», jaki raniej uznačalvaŭ Arsien Paŭłaŭ pa mianušcy Mataroła (bajavik byŭ viadomy svajoj žorstkaściu, jon zahinuŭ u 2016-m pry vybuchu ŭ lifcie). Ciapier pierajšoŭ u farmavańnie «Kaskad», jakoje niepasredna padparadkoŭvajecca ŭładam maryjanietačnaj «DNR».

U vykładzienym videa «Bulba» kaža, što jon vajuje na baku Rasii kala vaśmi hadoŭ i što jahony kamandzir taksama rodam ź Biełarusi. Ramančuk śćviardžaje, što «biełarusy nikoli nie buduć žyć tak, jak na Zachadzie, i atrymlivać try-čatyry tysiačy jeŭra, ničoha nie robiačy».

«Biełarusy, jakija znachodziacca doma, čakajcie nas, pieramoha budzie za nami, nabiaryciesia ciarpieńnia. My pieramožam, usio ŭładkujecca, i budzie mir. Nikoha nie słuchajcie, nie paddavajciesia na pravakacyi. Anijakaj revalucyi ŭ Biełarusi nie treba, revalucyi da dabra nie pryvodziać», — padsumoŭvaje mužčyna.

Apošnim časam praŭładnyja kanały pakazvajuć usio bolš bajevikoŭ-biełarusaŭ, jakija vajujuć na baku Rasii suprać Ukrainy. Robicca heta, mahčyma, dla taho, kab pierakanać u vialikaj padtrymcy Rasii ŭ vajnie z boku biełarusaŭ.

Pry hetym, zhodna ź biełaruskim Kryminalnym kodeksam, najomnictva (artykuł 133) ličycca złačynstvam niezaležna ad taho, na jakim baku pajechaŭ vajavać najmit. Ale pra hety artykuł ułady zhadvajuć čamuści tolki ŭ dačynieńni da vajaroŭ, jakija pajechali abaraniać Ukrainu.

Byvaje, što za biełaruskich bajevikoŭ prapahanda vydaje rasijan. Tak, niadaŭna «biełarus» z repartažu Azaronka, jaki vajuje za Rasiju, akazaŭsia ŭradžencam Surhuta.

• 11
• 0
• 11
• 35
• 2
• 4
• 106
• 0