Sabačaja moda. Jakija biełaruskija brendy stvarajuć stylnaje adzieńnie dla chatnich lubimcaŭ
Uładalniki sabak nie škadujuć srodkaŭ na kamfort svaich padapiečnych i kuplajuć im daždžaviki i miłyja kurtački. Pahladzieli, u jakich biełaruskich brendaŭ možna zładzić šopinh dla svajho lubimaha sabaki ci kata.
Ideja ŭpryhožvać svojskich žyvioł źjaviłasia ŭ Anhlii ŭ druhoj pałovie XVIII stahodździa. Da hetaha adzieńnie dla sabak taksama isnavała, ale nasiła vyklučna ŭtylitarny charaktar: šypavanyja kamizelki abaraniali hadavancaŭ padčas boju, a lazy, zamacavanyja na huńcy, dapamahali im lahčej vyrvacca z łap miadźviedzia padčas palavańnia. Ale mienavita pry dvary anhlijskaj karalevy Viktoryi na adzieńnie dla lubimcaŭ zirnuli z punktu hledžańnia mody. Prydvornyja damy prybirali svaich sabak u darahija karunki i ŭpryhožvali ašyjnikami z kaštoŭnymi kamianiami. Pryjści na śviecki raŭt ź nieapranutym sabačkam ličyłasia prykmietaj błahoha tonu.
Siońnia sabačaja moda pieražyvaje čarhovy bum, jaki źviazany z pandemijaj Covid-19. Padčas karancinu prodaž vyrabaŭ dla žyvioł biŭ usie rekordy, što nie dziŭna: u niekatorych krainach prahułka z sabakam była ledź nie adzinaj lehalnaj padstavaj vyjści z domu, i, kab hadavaniec moh hulać doŭha, jaho prychodziłasia ŭciaplać. Siońnia pik «pandemijnaha šopinhu» daloka zzadu, ale zvyčka kuplać abnoŭki lubimcam zastałasia. Kali vy chočacie paradavać vašaha čatyrochnohaha abnoŭkaj made in Belarus, pryhledźciesia da brendaŭ z našaj padborki.
Elema
Ucieplenyja kambiniezony, stylnyja huńki i kamizelki prapanuje tekstylny hihant «Elema». Madeli vytvorcy ŭpryhožany aryhinalnymi detalami: kišeniami, futram, pryntami i nadpisami.
Apranuć lubimca va ŭbor ad «Elemy» zmohuć haspadary jak minijaciurnych, tak i vialikich parod sabak: u apisańni kalekcyi paznačany šyroki pamierny šerah — ad XS da 4XL.
«Hiu-vas»
Jašče adzin bujny vytvorca sabačych rečaŭ znachodzicca ŭ Minsku. U asartymiencie staličnaha brenda možna znajści nie tolki adzieńnie, ale jašče cacki, lažanki i prystasavańni dla zatočvańnia kipciuroŭ — słovam, usio, čym možna paradavać svajho čatyrochnohaha.
Adznačym afarmleńnie sajta «Hiu-vas» — plušavaja taksa-madel, jakaja demanstruje kalekcyi, zdajecca nam asabliva kreatyŭnaj.
Lentochka
Łuk dla hadavanca možna vyrabić na zamovu — takaja opcyja važnaja nie tolki amataram unikalnych rečaŭ, ale taksama i haspadaram sabak, jakija majuć niestandartnyja paramietry. Pašyvam takoha adzieńnia zajmajecca viciebskaje atelje Lentochka. U instahramie brenda možna znajści prykłady rabot: kambiniezony, sukienki i navat zimovyja bociki.
Sonita Style
Adzieńnie pa indyvidualnych mierkach vyrablaje i Sonita Style — minski brend adšyvaje kurtački, kamizelki i jarkija chudzi. Dyzajniery kłapociacca ab kamforcie svaich «klijentaŭ» — rečy na daždžlivy siezon vyrablenyja ź niepramakalnaj tkaniny i ŭcieplenyja flisavaj padšeŭkaj. Zakazać ubor dla lubimca možna ŭ luby punkt śvietu: brend prapanuje svaim pakupnikam mižnarodnuju dastaŭku.
Knits Doggy
Jašče adzin ekskluziŭ dla chatnich hadavancaŭ — švedry, kamizelki i kambiniezony ručnoha vyrabu. Cikava, što rečy dla svaich ulubioncaŭ u Knits Doggy znojduć i amatary košak — ich hadavancam prapanujucca miłyja šapački na zaviazkach i kofty.
Lubicie svaich žyvioł i pamiatajcie, što my niasiom adkaznaść za tych, kaho pryručyli, u tym liku za ich harderob.
Kamientary
uhu. spasiba. kep
a jak pryručyć samu siabie?