Novyja supracoŭniki pry pracy z domu demanstrujuć źnižeńnie pradukcyjnaści na 18% — vučonyja

Daśledčyki z Masačusieckaha technałahičnaha instytuta i Kalifarnijskaha ŭniviersiteta ŭ Łos-Andželesie vyvučali pracu novych supracoŭnikaŭ pa ŭvodu danych u Indyi.

Naležnyja kandydaty byli zaprošanyja na ŭstupnuju hutarku, padčas jakoj jany vykanali karotkija zadańni pa ŭvodu danych, jakija rehistravali chutkaść i kolkaść pamyłak, kab vyznačyć ich zdolnaść na zychodnym uzroŭni. Na hetym etapie suiskalnikaŭ pytalisia ab ich pieravahach pamiž pracaj u ofisie i pracaj z domu pry adnolkavych umovach i na identyčnym abstalavańni.

Zatym usie novyja supracoŭniki byli vypadkovym čynam (randomna) raźmierkavanyja na pracu doma ci ŭ ofisie. Nazirańnie za vynikami pravodziłasia ciaham vaśmi tydniaŭ. Usie ŭdzielniki byli taksama prainfarmavanyja ab tym, što ŭ kožnaha ź ich jość šaniec atrymać rekamiendacyju na bolš doŭhaterminovuju pracu paśla zaviaršeńnia 8-tydniovaha pieryjadu. Pachvilinnaja pradukcyjnaść, a taksama čas prastoju rehistravalisia praz prahramnaje zabieśpiačeńnie dla ŭvodu danych.

Navukoŭcy sprabavali vyvučyć efiekt pracy doma ŭ paraŭnańni z pracaj u ofisie. Dla hetaha jany paraŭnoŭvali vyniki rabotnikaŭ ź dźviuch randamizavanych hrup niezaležna ad ich pieravah adnosna ŭmoŭ pracy (dom ci ofis).

Daśledavańnie taksama dazvoliła adkazać na pytańnie, ci isnuje ŭzajemadapaŭnialnaść pamiž peŭnymi typami rabotnikaŭ i ofisnaj pracaj i ci adlustroŭvaje piersanalny vybar rabotnika hetuju ŭzajemadapaŭnialnaść.

Navukoŭcy vyjavili, što rabotniki, vypadkova pryznačanyja pracavać z domu na poŭny pracoŭny dzień, byli na 18% mienš pradukcyjnyja, čym tyja, chto pracavaŭ u ofisie. Dźvie traciny efiektu źnižeńnia pradukcyjnaści byli prykmietnyja ź pieršaha pracoŭnaha dnia. Astatniaje jość vynikam bolš praciahłaha navučańnia chatniaj hrupy na praciahu nastupnych vaśmi tydniaŭ.

Efiekt ad pracy ŭ ofisie byŭ asabliva vialiki, kali rabotnikam daručali bolš składanyja zadačy.

Navukoŭcy vyjavili niekatoruju adnosna abmiežavanuju nieadnastajnaść u efiekcie ofisa dla roznych typaŭ rabotnikaŭ. Pažyłyja žančyny, bahaciejšyja i žanatyja rabotniki demanstravali najbolšy efiekt ad pracy ŭ ofisie. Ale hety efiekt byŭ nulavym dla peŭnych hrup, naprykład, bolš biednych rabotnikaŭ, rabotnikaŭ, jakija addajuć pieravahu niapoŭnamu pracoŭnamu dniu, žančyn z abaviazkami pa dohladu za siamjoj.

Pa-druhoje, navukoŭcy vyjavili, što ludzi, jakija pracujuć lepš, čaściej vybirajuć pracu doma, a nie ŭ ofisie. Hetaja vysnova paćviardžajecca vynikami vymiareńnia zdolnaściaŭ rabotnikaŭ pa ŭvodzie danych padčas hutarki. Tak, tyja, chto skazaŭ, što im padabajecca pracavać z domu, byli na 12% chutčejšymi ŭ vykanańni zadańniaŭ za tych, chto adznačyŭ, što im padabajecca pracavać u ofisie. Jany taksama byli bolš dakładnyja va ŭvodzie danych i mienš marnavali čas.

Aŭtary pasprabavali zrazumieć, čym abumoŭleny vybar ludźmi miesca pracy. Jany vykazali zdahadku, što, moža, ludzi ź nižejšymi zdolnaściami bolš vyjhrajuć ad pracy ŭ ofisie i tamu žadajuć tam pracavać. Moža być, jany viedajuć, što im patrebny ofis dla taho, kab kantralavać siabie ci vučycca ŭ inšych. A ludzi z bolš vysokimi zdolnaściami dumajuć, što im usio adno dzie pracavać, tamu što jany i tak dobra spraŭlajucca i nie majuć patreby ŭ dapamozie.

Ale kali navukoŭcy pravieryli hetyja idei, to ŭbačyli, što heta nie tak. Vyniki pakazali, što ludzi, jakija chočuć pracavać doma, źnižajuć svaju vynikovaść, kali im dajuć takuju mahčymaść. Jany hublajuć 27% svajoj pradukcyjnaści pry pracy doma ŭ paraŭnańni z pracaj u ofisie. A ludzi, jakija chočuć pracavać u ofisie, pry pieravodzie ŭ «chatni ofis» hublajuć tolki 13%.

Ale nie treba śpiašacca z vysnovami i ŭsich zahaniać u ofisy. Aŭtary źviartajuć uvahu na nieabchodnaść vyśvietlić matyvacyju ludziej pracavać doma. Mahčyma, heta abumoŭlena najaŭnaściu kulturnych (naprykład, zabarona žančynam pracavać pa-za miežami doma) ci asabistych pierakanańniaŭ, nieabchodnaściu vychoŭvać dziaciej ci inšymi abaviazkami pa domie. Na dumku navukoŭcaŭ, kali matyvy niekatorych rabotnikaŭ na pracu z domu vielmi mocnyja, to takija ŭmovy mohuć dazvolić im udzielničać u ekanomicy. U advarotnym vypadku jany nie zmahli b atrymać pracu.

Vydańnie Bloomberg źviartaje ŭvahu na toje, što vysnovy hetaj pracy adpaviadajuć inšym, jakija vyjavili, što całkam dystancyjnaja praca mienš pradukcyjnaja, čym praca ŭ ofisie abo hibrydnaja. U toj ža čas jana moža być apraŭdanaja dla kampanij, jakija ekanomiać značnyja sumy na nieruchomaj majomaści.

Novaje daśledavańnie, zaznačaje vydańnie, padkreślivaje prablemy, ułaścivyja daśledavańniam pradukcyjnaści. Tak jak rabotniki, jakija ŭdzielničali ŭ ekśpierymiencie, byli niadaŭna naniatyja, ich vyniki mohuć adroźnivacca ad vynikaŭ supracoŭnikaŭ, jakija pierajšli na całkam dystancyjnuju pracu tolki paśla taho, jak pieršapačatkova praviali značny čas u ofisie.

Bloomberg adznačaje, što cytavanaje daśledavańnie nie daje poŭnych adkazaŭ dla kiraŭnikoŭ, jakija sprabujuć dać rady situacyi hibrydnaj pracy, jakaja zastajecca pieravažnaj madellu ŭ ZŠA.

Niadaŭni bujnamaštabny analiz kansałtynhavaj firmy McKinsey & Co. svajho piersanału pakazaŭ, što kala 50% času, praviedzienaha ŭ ofisie, było aptymalnym dla hibrydnaj pracy. Štości bolš za heta škodziła hnutkaści i času kancentracyi i nie palapšała pradukcyjnaści.

Inšaje randamizavanaje kantrolnaje daśledavańnie pakazała, što hibrydnyja schiemy pracy nie akazali istotnaha ŭpłyvu na pradukcyjnaść, choć supracoŭniki byli značna ščaśliviejšyja i ź mienšaj imaviernaściu prymali rašeńnie ab zvalnieńni.

Vydańnie adznačaje, što mnohija artykuły, jakija krytykujuć dystancyjnuju pracu i pryvodziać dokazy taho, što jana mienš pradukcyjnaja, nasamreč kažuć pra całkam addalenuju pracu, tady jak dla bolšaści ludziej važnaj źjaŭlajecca mahčymaść hibrydnaj pracy. Tamu nieabchodna pamiatać pra hetyja niuansy.

Čytajcie jašče:

Google prymušaje supracoŭnikaŭ viarnucca ŭ ofis

Štučny intelekt u ofisie nie dadaje rabotnikam ščaścia 

• 5
• 0
• 0
• 1
• 1
• 0
• 1
• 0