Užyvańnie sałataŭ padčas pryjomu antybijotykaŭ moža pryvieści da ŭźniknieńnia niebiaśpiečnych supierbakteryj — navukoŭcy

Jak piša The Times, pavodle vynikaŭ daśledavańnia navukoŭcaŭ z Notynhiemskaha ŭniviersiteta, apublikavanych u časopisie Plos One,

bakteryi z hienami ŭstojlivaści da antybijotykaŭ mohuć chavacca ŭ syroj sadavinie i harodninie, asabliva ŭ takich karaniapłodach, jak radyska i morkva, a taksama ŭ «hatovych da ŭžyvańnia» sałatach z supiermarkietaŭ.

Navukoŭcy śćviardžajuć, što pry spažyvańni takich praduktaŭ padčas kursa antybijotykaŭ isnuje vialikaja imaviernaść taho, što bakteryi pasielacca ŭ kišečniku čałavieka. Kali heta adbudziecca, to ŭzrastaje ryzyka taho, što ŭ budučyni leki nie zmohuć pracavać hetak ža efiektyŭna dla praduchileńnia infiekcyj.

«Kali vy prymajecie antybijotyki, to heta mienavita toj čas, kali vy najbolš uraźlivyja da ŭźniknieńnia doŭhaterminovych prablem praz bakteryi ź ježy, jakija ŭstojlivyja da lekaŭ. Kali vy jaście niešta, na čym jość bakteryi, jakija źmiaščajuć niekatoryja hieny ŭstojlivaści da lekaŭ, i prymajecie antybijotyki, to hetaja ŭstojlivaść moža zamacavacca ŭ ekasistemie vašaha kišečnika.

Tamu nastupny raz, kali vam spatrebiacca antybijotyki, jany mohuć akazacca nieefiektyŭnymi», — cytuje vydańnie słovy adnaho z aŭtaraŭ daśledavańnia prafiesara bijałohii Notynhiemskaha ŭniviersiteta Dova Stekiela.

Papiaredniaje daśledavańnie pakazała, što kolkaść hienaŭ ustojlivaści da antybijotykaŭ u mikrabijomie kišečnika — supolnaści bakteryj, jakija vyjaŭlajucca ŭ stravavalnaj sistemie, — pavialičvajecca paśla dziacinstva.

U svaim daśledavańni Stekiel z kalehami vyvučali pryčyny hetaha pavieličeńnia. Było vyjaŭlena, što doŭhaterminovy rost rezistentnaści mikrabijomu kišečnika čałavieka možna istotna źnizić, pamienšyŭšy ŭździejańnie ŭstojlivych bakteryj, jakija znachodziacca ŭ ježy i vadzie, i prymajučy mienš antybijotykaŭ.

Stekiel adznačaje, što bakteryi z rezistentnymi hienami ŭ kišečniku ŭjaŭlajuć saboj prablemu. Jon tłumačyć heta tym, što niekatoryja vidy infiekcyj uźnikajuć, kali bakteryi, jakija byli biasškodnyja ŭ kišečniku, pieramiaščajucca ŭ inšyja častki cieła. Pavodle jaho słoŭ, jany čaściej za ŭsio pryvodziać da infiekcyj močavydzialalnych šlachoŭ (IMŠ).

Luby čałaviek moža zachvareć na IMŠ u lubym vieku, ale čaściej za ŭsio jany sustrakajucca ŭ žančyn i pažyłych ludziej i mohuć varjiravacca pa stupieni ciažkaści ad lohkaj (cystyt) da niebiaśpiečnaj dla žyćcia infiekcyi nyrak i siepsisu. Tamu asabliva važna, kab hetyja antybijotyki pracavali ŭ pažyłych ludziej.

Inšy prykład — heta infiekcyi kryvi, što znoŭ ža asabliva važna dla pažyłych ludziej ci ludziej z asłablenym imunitetam. Pry hetych infiekcyjach važna, kab antybijotyki dziejničali chutka. 

Tamu navukoŭcy rekamiendujuć daktaram davać dyjetyčnyja rekamiendacyi tym, chto prachodzić kurs lačeńnia antybijotykami, kab paźbiahać praduktaŭ z pavyšanaj ryzykaj pieranosu hiena ŭstojlivaści da supraćmikrobnych preparataŭ (navat niepatahiennych), a taksama prytrymlivacca taho, kab usia ježa, spažyvanaja padčas lačeńnia, była całkam hatavanaja.

Čytajcie jašče:

Novy mietad transpłantacyi mikrabijoty dazvalaje lačyć šmat jakija chvaroby. A jaje krynica vas vielmi ździvić

Jak miljardy mikraarhanizmaŭ u kišečniku mohuć umacavać vaša psichičnaje zdaroŭje 

Navukoŭcy vyjavili paradaksalny ŭpłyŭ pracesaŭ u kišačniku na stareńnie

• 7
• 0
• 0
• 1
• 10
• 1
• 3
• 0