Zorny čas Julii Barysionak pačaŭsia ŭ vieraśni 2020-ha. Tady jana nazvała siabie «inicyjatarkaj ruchu «Antyvandał», i za jaje ŭchapilisia dziaržaŭnyja miedyja, jakim adčajna patrabavalisia prykłady, što «prostyja hramadzianie», a nie tolki ludzi z dubinkami, stali na abaronu dyktatury. Voś jak dalej skłaŭsia los Julii.
U 2020-m Julii Barysionak byŭ 31 hod. Zhodna sa źviestkami z baz «Kibierpartyzanaŭ», žančyna pracavała ŭ hałoŭnym upraŭleńni justycyi Minharvykankama i pary pryvatnych firmaŭ. Na červień 2020-ha ŭ bazie FSAN jana, adnak, była zapisanaja jak časova biespracoŭnaja. U sakaviku 2020-ha źjaviłasia staronka, pryviazanaja da numara, jakim jana pastajanna karystajecca z 2020-ha, — «Julija Majstar». Tam prapanujucca pasłuhi manikiuru.
Rodam Barysionak ź Minska, vučyłasia ŭ škole ŭ rajonie Anharskaj. Hety ŭ minułym rabočy rajon u 1990 hodzie abraŭ u Viarchoŭny Saviet tady jašče BSSR Zianona Paźniaka. U 2020 hodzie tut masava hałasavali za Śviatłanu Cichanoŭskuju.
Ëść kopii pratakołaŭ učastkovych kamisij, jakija śviedčać pra heta.
Tak, na ŭčastku numar 8 na vulicy Hierasimienki, 10, u siaredniaj škole № 162, dzie vučyłasia Julija, Cichanoŭskaja aficyjna atrymała 615 hałasoŭ, Łukašenka — 276. A na ŭčastku numar 22 na vulicy Anharskaj, 4/2, u internacie Minskaha padšypnikavaha zavoda, Cichanoŭskaj zapisali 561 hołas, Łukašenku — 463. Kali adniać ličby nierealna masavaha daterminovaha hałasavańnia, dzie biuleteni lohka padmianić unačy, to razryŭ byŭ navat piać da adnaho.
Čytajcie taksama: Jak hałasavali za Cichanoŭskuju. Niesfalsifikavanyja pratakoły prezidenckich vybaraŭ
Falsifikacyja vybaraŭ vyklikała burnyja pratesty, Minsk za ličanyja tydni pakryŭsia palityčnymi hrafici, a simvałam pratestaŭ stała nacyjanalnaja simvolika. Tady i ŭźnikła hrupa «Antyvandał», jakuju adrazu pačali pijaryć dziaržaŭnyja miedyja. Vandalizmam jany nazyvali palityčnyja znaki ŭ publičnaj prastory, pryčym vyklučna antyłukašenkaŭskija.
Udzielniki hrupy pad achovaj siłavikoŭ zrazali bieł-čyrvona-biełyja stužki, zdymali nacyjanalnyja ściahi, pieramaloŭvali hrafici. «Antyvandały» pieratvarali bieł-čyrvona-biełyja nadpisy i simvały ŭ čyrvona-zialonyja.
Pisali jany i zvyčajnyja danosy. Tak, u kastryčniku 2020-ha Julija patelefanavała ŭ milicyju i paviedamiła, što ŭ Minsku na praśpiekcie Puškina dva čałavieki stvarajuć murał z Kaleśnikavaj.
Zapis taho, jak «antyvandały» kaardynavali svaje dziejańni z kiraŭnikom minskaha AMAPa Dźmitryjem Bałabam, u svoj čas trapiŭ u internet. U adnoj z takich hrup była zaŭvažanaja Natalla Ejsmant, pres-sakratarka Łukašenki.
Mienavita takaja hrupa, imavierna, z udziełam chakiejnaha treniera Dźmitryja Baskava i kikbaksiora z MUS Dźmitryja Šakuty, dziejničała na «Płoščy Pieramien», kali tam byŭ źbity da śmierci Raman Bandarenka.
Paśla pačatku masavych represij, kali za luby palityčny pratest ludziej pačali aryštoŭvać i davać ad vielizarnych štrafaŭ da realnych terminaŭ kałonii, vuličnaja pratesnaja aktyŭnaść spała. Spyniłasia i dziejnaść «antyvandałaŭ».
A što było ź Julijaj paśla?
Miarkujučy pa dopisach sa staronki, źviazanaj ź jaje numaram, žančyna niejki čas zajmałasia prybirańniem kvater i ofisaŭ.
Siarod fota — vyčyščanyja vannyja pakoi i tualety, kuchni i prastory paśla budoŭli. Datujucca hetyja fota kancom 2020-ha i viasnoj 2021-ha.
U studzieni 2021-ha jana atrymała padziaku ad milicyi i administracyi Leninskaha rajona razam ź inšymi «antyvandałami». Padčas uznaharodžańnia jana jašče raz paŭtaryła, što «pačynała sama, a paśla stali dadavacca ludzi». Taksama jana raskazała, što jany prosta «rabili horad takim, jakim jon pavinien być».
Julija Naryvončyk. Adzin ź jaje starych avataraŭ u telehramie
U publičnym poli jana paśla hetaha nie źjaŭlałasia. Zatoje, zdajecca, padčas svajoj hramadskaj dziejnaści znajšła asabistaje ščaście. Vyjšła zamuž jana za čałavieka blizkich pohladaŭ.
Śpiecnazaviec Naryvončyk
Jaje muž — 34-hadovy śpiecnazaviec Jaŭhien Naryvončyk. Razam jany nie mienš za paŭtara hoda.
Jaŭhien Naryvončyk daŭno pracuje ŭ milicyi. Apošnija 10 hadoŭ jon dakładna pravioŭ u čaści śpiecnaza 3214, jakaja bazujecca va Uruččy.
Publična jon zaśviaciŭsia ŭ studzieni 2021-ha. Tady jany z bratam Ivanam i jašče tryma siłavikami, pieraapranutymi ŭ zialonyja spartyŭki, raźviešvali čyrvona-zialonuju simvoliku na vokny damoŭ žycharoŭ buntoŭnaj Novaj Baravoj.
Na 2015-y jon byŭ staršym lejtenantam i kamandziram roty. Ciapier, zhodna sa źviestkami, jakija «Našaj Nivie» pieradaŭ BelPol, hety ŭładalnik krapavaha biereta słužyć u zvańni majora i zajmaje pasadu namieśnika načalnika centra, kamandzira hrupy fizičnaj padrychtoŭki i sportu v/č 3214.
A ŭ lutym 2023-ha Naryvončyk byŭ u žury «vajskova-patryjatyčnaha konkursu» dla dzieviacikłaśnikaŭ.
A Julija źmianiła va ŭsich sacsietkach proźvišča na mužava.
«Naša Niva» — bastyjon biełaruščyny
PADTRYMAĆŠto viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?18
Što viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu2222
Kamientary