Chłopiec kupiŭ «trup» Passat, reanimavaŭ jaho i staŭ zorkaj tyktoku. Jak było i jak stała — uražvaje
Kali hladziš na fota da, ciažka pavieryć, što mašynu možna davieści da takoha stanu. Zatym pieravodziš pohlad na bliskučy čorny ŭniviersał i nie razumieješ, jak atrymałasia z taho, što było, zrabić takuju cukierku. Historyju pra maładoha chłopca z Hrodna z załatymi rukami raskazvaje Onliner.
Alaksandru 34 hady, pa pieršaj adukacyi jon ślesar miechanazboračnych prac, pa druhoj — bankir. Jašče zusim niadaŭna jon haniaŭ pa rodnym horadzie na dvuch BMW: matacykle S1000RR i dvoječcy ŭ kuzavie F44. Što ž prymusiła maładoha čałavieka pierasieści na dyzielny zabity Passat B6, dy jašče i zajmacca jaho adnaŭleńniem?
— Źbirajemsia pierajazdžać. Vyrašyŭ, treba ž da hetaha momantu na niečym jeździć… Šukaŭ tannuju i praktyčnuju mašynu. Tak, dyzielny ŭniviersał sapraŭdy praktyčnaja mašyna, ale stan hetaha ekzemplara byŭ žudasny. Ź inšaha boku, dziŭna, ale mašyna praktyčna ŭsia zastavałasia ŭ zavadskoj farbie, tolki adno kryło było farbavana. Pad kapotam taksama ŭsio było roŭna. Mašyna 2007 hada, była ŭ apošniaha ŭładalnika 9 hadoŭ.
Nasamreč kupiŭ ja jaje vypadkova: mnie znajomy videa žartoŭnaje z tyktoka skinuŭ. Zajšoŭ na barachołku — akazvajecca, pradajecca. Spačatku ŭ jakaści cany pakazali $3900 pa kursie, zatym skinuli da $3400. Pryjaciel jakraz u Minsk jechaŭ, i ja paprasiŭ jaho hetu mašynu zirnuć. U pieršuju čarhu mianie cikaviŭ ruchavik. A z kuzaŭščynaj, vyrašyŭ, dam rady samatuham.
Mašyna akazałasia na chadu, a haspadar skinuŭ canu da $2800 — ja vyrašyŭ brać. Pa darozie dadomu vyjavilisia prablemy z KPP i zadniaj padvieskaj. Ale i heta było niekrytyčna, bo moj brat — vialiki śpiecyjalist mienavita ŭ hetaj temie.
Usio zrabili prykładna za miesiac. Kryšku bahažnika mnie addaŭ raniejšy haspadar, dźviery pryvieźli ź Litvy, kapot znajšoŭ u nas na aŭtarazborcy za 50 rubloŭ. Zadnija kryły pieravarvali, piarednija kuplaŭ novyja (tajvańskija) pa 130 rubloŭ za štuku. Plus nieabchodnyja byli zapčastki dla padvieski, inšyja dyski z pakryškami, špatloŭka, naždačka, hrunt, farba i łak.
Na ŭsio spatrebiłasia kala 1300 dalaraŭ u ekvivalencie. U vyniku na hety Passat vydatkavaŭ 4100 dalaraŭ pa kursie (sama mašyna i adnaŭleńnie). Naturalna, usio heta biez uliku našaj z bratam pracy. Addaj ja hety aŭtamabil dla adnaŭleńnia ŭ majsterniu – i canu možna było b pamnožyć na dva. Naturalna, nijakaj metazhodnaści ŭ nabyćci mašyny pa takoj canie niama. Ale i kuplaŭ ja jaje nie dla zarobku. Kali b na joj možna było niešta navaryć, to daŭno b jaje zabrali mienskija pierakupščyki.
Zhnili mienavita naviesnyja detali i zadnija arki. Na parohach choć i bačnyja byli ślady ržy, ale skraznych dzirak nie było. Dno akazałasia ŭ dobrym stanie, a da łanžeronaŭ naohuł nie było pytańniaŭ. Moža, kali b hetuju mašynu čaściej myli, to i nie zhniła b tak mocna.
Pakul pradavać dakładna nie płanuju. Ja ž svoj BMW pradaŭ, z mašynaj žonki zrabili anałahična. Pakul u nas hety VW Passat adzin na dvaich. Užo pierad samym adjezdam, zrazumieła, budziem vystaŭlać jaho na prodaž, ale zdarycca heta tolki ŭ śniežni.
Darečy, chłopiec zapisaŭ videa ŭ tyktoku sa svajoj novaj mašynaj i staŭ ci nie samym papularnym uładalnikam mašyny Passat: videa pahladzieli 5,6 młn razoŭ.
Ciapier čytajuć
U kadr znoŭ trapiła, jakim pamieram šryfta dla Łukašenki drukujuć vystupy, kab jon bačyŭ13
Kamientary