Roźnica — da 2000 rubloŭ. Paraŭnoŭvajem ceny na pieraloty ź Minska i susiednich stalic
Bolšaść avijamaršrutaŭ ź Biełarusi siońnia — u Rasiju. Aproč jaje, «Biełavija» lotaje tolki ŭ 10 krain. Vybar nievialiki, ale časam davoli ekzatyčny. Pahladzieli, jakija rejsy ź Minska ciapier jość i kolki kaštujuć kvitki.
AAE
Dubaj dastupny biełarusam čatyry razy na tydzień, usiaho kala šaści hadzin — i vy ŭžo ŭ Emiratach. Kvitki na najbližejšyja daty praktyčna razabranyja, a paloty ŭ listapadzie abyducca ad 1020 rubloŭ ź Minska ŭ Dubaj i ad 1160 — nazad.
Trojčy na tydzień «Biełavija» lotaje i ŭ Šardžu — čas palotu amal taki ž, jak i ŭ Dubaj, a ceny vyšejšyja: ad 1230 rubloŭ tudy i ad 1520 — nazad. Heta kvitki biez bahažu.
Azierbajdžan
Kab dalacieć ź biełaruskaj stalicy ŭ azierbajdžanskuju, treba ad 440 rubloŭ i amal čatyry hadziny lotu. Nazad — ad 545 rubloŭ i toj ža čas. Tudy i nazad jość rejsy čatyry dni na tydzień.
Armienija
Źlotać u Jerevan bolš darahoje zadavalnieńnie — ad 700 rubloŭ, viarnucca — ad 750. Heta ŭsio taryfy biez bahažu. U darozie pryjdziecca pravieści ad čatyroch hadzin. Vylety, jak i ŭ Azierbajdžan, čatyry razy na tydzień.
Hruzija
Pramyja rejsy jość u try hruzinskija harady — Tbilisi, Batumi i Kutaisi. Kab u najbližejšyja tydni patrapić u stalicu Sakartveła, treba mieć minimum 965 rubloŭ, kab viarnucca — 1050, rejs štodzionny. Čas u darozie — kala čatyroch hadzin. Na bolš poźnija daty kvitki buduć tańniejšymi amal udvaja.
Z Batumi situacyja lepšaja: ad 530 rubloŭ tudy i ad 640 nazad na najbližejšy čas, na paloty zimoj ceny prykładna takija ž. Rejs Minsk — Batumi ŭ nieturystyčny siezon vykonvajecca čatyry razy na tydzień, čas palotu — čatyry hadziny tudy i plus 15 chvilin pry viartańni ŭ Minsk.
U nievialiki haradok Kutaisi kvitki na najbližejšyja daty kaštujuć ad 650—680 rubloŭ u adzin bok. Lacieć čatyry hadziny. Kali zaraz kuplać kvitki na zimu, to budzie tańniej prykładna na 150 rubloŭ u adzin bok.
Kazachstan
Astana taksama traplaje ŭ katehoryju «łakšery», bo samy tanny kvitok tudy kaštuje 740 rubloŭ, heta na najbližejšyja tydni i biez bahažu. Kab viarnucca ŭ Biełaruś, treba vydatkavać minimum 710 rubloŭ. Daroha, jak i dla mnohich inšych kirunkaŭ, zajmaje ŭ siarednim čatyry hadziny. Zimoj ceny nie nadta mienšyja, na 20—50 rubloŭ.
Indyja
Rejs Minsk — Deli — Minsk «Biełavija» adkryła ŭ žniŭni. Ciapier samaloty lotajuć u Indyju raz na tydzień, a ŭ listapadzie buduć dvojčy. Adnak adtul u Biełaruś budzie ŭ najbližejšy čas pa-raniejšamu adzin rejs — prynamsi, pra toje kaža kalandar na sajcie biełaruskaha avijapieravozčyka.
Kab apynucca ŭ Indyi, treba pravieści 6 hadzin i 40 chvilin u darozie i vydatkavać minimum 1100 rubloŭ (biez bahažu), nazad prykładna takaja ž cana, ale ž šlach zojmie 7 hadzin i 15 chvilin.
Turkmienistan
Dla tych, kamu brakuje dyktatury, jość cudoŭny kirunak — horad Turkmienbašy. «Biełavija» lotaje tudy ź Minska raz na tydzień. Na najbližejšyja daty kvitkoŭ niama, ale ich možna kupić na listapad — ad 1400 rubloŭ tudy i ad 1450 nazad. Šlach zojmie čatyry hadziny i dziesiać-dvaccać chvilin.
Turcyja
Samaloty ŭ Stambuł adpraŭlajucca štodnia, časam i dvojčy na dzień. Daroha ŭ turystyčny turecki horad zajmaje piać z pałovaj hadzin, kaštuje hetaje zadavalnieńnie ad 1160 rubloŭ, daroha nazad abydziecca minimum u 1440 rubloŭ, stolki ž z ručnoj pakłažaj i na najbližejšyja tydni. Zimoj budzie tańniej: ad 850 rubloŭ za kvitok.
Uźbiekistan
«Biełavija» lotaje ŭ Taškient dvojčy na tydzień, daroha zajmaje čatyry hadziny i 20 chvilin tudy i piać hadzin nazad. Kvitki na najbližejšyja daty abyducca ad 770 rubloŭ tudy i ad 830 — nazad, zimoj buduć troški tańniejšymi.
A što nakont cen z Polščy i Litvy?
Źlotać u chutkim časie z Varšavy ŭ Tbilisi i viarnucca budzie kaštavać ad 871 rubla ŭ abodva baki (heta na 1100 tańniej za maršrut Minsk — Tbilisi — Minsk). Daroha zojmie stolki ž času, jak i ź biełaruskaj stalicy, — amal čatyry hadziny. Heta nie łaŭkost, takija kvitki prapanuje polskaja avijakampanija LOT.
Padarožža z Varšavy ŭ indyjski Deli ŭ listapadzie kaštuje minimum 1650 rubloŭ (ad 726 tudy i ad 930 nazad). Heta na 550 rubloŭ tańniej, čym padarožža ź Minska, čas u darozie — kala 8 hadzin.
Taja ž situacyja ź inšymi krainami. Kazachstan budzie tańniejšym z Polščy na 400 rubloŭ. Turcyja darahavataja (ad 1500 z Varšavy ŭ Stambuł i nazad, što ŭsio roŭna na tysiaču rubloŭ tańniej za taki ž maršrut ź Biełarusi), ale łaŭkostami budzie kaštavać kala 800 rubloŭ u abodva baki. Źlotać z Varšavy ŭ Dubaj u listapadzie budzie kaštavać ad 1000 rubloŭ, što prykładna na tysiaču rubloŭ mieniej za canu pieralotu ź Minska.
Źlatać ź Vilni ŭ hruzinski Kutaisi ŭ listapadzie možna ad 250 rubloŭ u abodva baki (dziakujučy łaŭkostu Wizzair ekanomicie 1200 rubloŭ u paraŭnańni z «Biełavijaj»), u Tbilisi — ad 751 rubla (minus 1250 rubloŭ).
Maršrut Vilnius — Stambuł — Vilnius u listapadzie abydziecca ad 620 rubloŭ (i heta na 2000 tańniej za pieralot ź Minska i nazad).
Dubaj ź litoŭskaj stalicy taksama tańniejšy — ad 1200 rubloŭ u abodva baki, roźnica z «Biełavijaj» — tysiača rubloŭ.
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady38
Kamientary