«Byli traŭmy na hałavie». Stali viadomy padrabiaznaści špitalizacyi Viktara Babaryki naprykancy krasavika
U noč z 24 na 25 krasavika palitźniavolenaha eks-bankira i byłoha kandydata ŭ prezidenty Viktara Babaryku dastavili ŭ haradski špital z navapołackaj kałonii № 1. Tam jaho pratrymali niekalki dzion. Čałaviek, jaki atrymaŭ źviestki ad vidavočcy padziej, što razhortvalisia ŭ špitali naprykancy krasavika ź Viktaram Babarykam, raspavioŭ pravaabaroncam «Viasny» padrabiaznaści incydentu.
Pa słovach Mikałaja (imia źmieniena ŭ metach biaśpieki), Viktar Babaryka byŭ dastaŭleny ŭ chirurhičnaje adździaleńnie Navapołackaj centralnaj haradskoj balnicy mocna źbitym. Heta byŭ druhi vyklik chutkaj dapamohi ŭ kałoniju da Viktara. Padčas pieršaha vizitu supracoŭnikaŭ chutkaj dapamohi ŭ špitalizacyi było admoŭlena. Paviedamlajecca, što admova była napisanaja načalnikam kałonii. Padčas druhoha vizitu lekaru bryhady chutkaj dapamohi ŭdałosia pierakanać supracoŭnikaŭ kałonii ŭ nieabchodnaści špitalizacyi Viktara Babaryki ŭ stacyjanar.
«U abodvuch vypadkach bryhady atrymali instrukcyi ad kiraŭnictva navapołackaj balnicy: z pacyjentam u kantakt nie ŭstupać, hutarki nie vieści, nie padavać nijakich znakaŭ».
Sa svajho boku, supracoŭniki chutkaj dapamohi praviali nieabchodnyja abśledavańni (ahlad, zamier arteryjalnaha cisku, zapis elektrakardyjahramy) i dastavili mužčynu ŭ stacyjanar. U pryjomnym pakoi Viktar byŭ ahledžany dziažurnym lekaram, byli praviedzieny nieabchodnyja daabśledavańni (ahulny analiz kryvi, mačy, renthien hałavy i orhanaŭ hrudnoj kletki)».
Papiaredni dyjahnaz byŭ — vadkaść u lohkich, ale jon nie paćvierdziŭsia. Mikałaj śćviardžaje, što Viktar Babaryka atrymaŭ traŭmy ŭ vyniku źbićcia. Adpaviednyja traŭmy byli na hałavie — ich niemahčyma atrymać pry padzieńni, naprykład.
«Na ŭsie abśledavańni Viktara supravadžali kanvairy. Lekaram i siaredniamu miedpiersanału balnicy byli dadzieny rekamiendacyi ab tym, što z pacyjentam nielha razmaŭlać, pieramihvacca i h.d. Pry hetym, na abśledavańni (naprykład, ultrahukavoje daśledavańnie) Viktara pad kanvojem vadzili praź niekalki adździaleńniaŭ.
Na praciahu niekalkich dzion, jakija Viktar Babaryka pravioŭ u chirurhičnym adździaleńni, jon znachodziŭsia ŭ pałacie dla źniavolenych z zakratavanymi voknami i pad pastajannym kantrolem kanvairaŭ, jakija sačyli za ŭsimi dziejańniami miedpiersanału, spyniajučy lubuju mahčymaść pieradačy jakoj-niebudź infarmacyi».
Pavodle Mikałaja, naviedvańni Viktara byli pad zabaronaj, rodnym i blizkim nie paviedamlali pra jaho miescaznachodžańnie i stan zdaroŭja.
«Praz try-čatyry dni ludzi ŭ pahonach pavieźli Viktara ŭ nieviadomym kirunku na aŭtamabili, jaki nie ličycca na bałansie navapołackaj haradskoj balnicy».
Jak adznačaje Mikałaj, z takimi traŭmami, jakija byli ŭ Viktara Babaryki, pacyjentaŭ špitalizujuć minimum na 7-10 dzion. Paźniej źjaviłasia infarmacyja, što Viktara Babaryku viarnuli ŭ kałoniju i źmiaścili ŭ PKT.
Viktar Babaryka byŭ zatrymany 18 červienia 2020 hoda razam z synam Eduardam, kali nakiroŭvaŭsia ŭ CVK dla zdačy sabranych podpisaŭ. 6 lipienia 2021 hoda eks-bankira asudzili da 14 hadoŭ kałonii. Praz dva hady da vaśmi hadoŭ kałonii asudzili jaho syna.
Kamientary