Śpis najlepšych sieryjałaŭ pa viersii The New York Times

Za pieršuju čverć XXI stahodździa sieryjały źmianilisia amal da niepaznavalnaści. Televizijny bum, źjaŭleńnie stryminhavych płatformaŭ i vialikija biudžety pryviali na telebačańnie akcioraŭ, režysioraŭ i scenarystaŭ, jakija raniej pracavali pieravažna ŭ vialikim kino. Sieryjały pieratvarylisia ŭ adnu z hałoŭnych formaŭ sučasnaj masavaj kultury.

The New York Times vyrašyła padvieści vyniki hetych dvuch z pałovaj dziesiacihodździaŭ i vyznačyć sto najlepšych sieryjałaŭ XXI stahodździa. Raniej vydańnie składała padobnyja rejtynhi knih i filmaŭ.

Bolš za 500 akcioraŭ, režysioraŭ, scenarystaŭ, pradziusaraŭ, kiraŭnikoŭ studyj i inšych pradstaŭnikoŭ industryi nazvali pa dziesiać najlepšych sieryjałaŭ, premjera jakich adbyłasia nie raniej za 1 studzienia 2000 hoda. Na padstavie ich hałasoŭ i skłali vynikovuju sotniu.

U rejtynhu jość adno istotnaje abmiežavańnie: uličvaŭsia hod premjery, a nie toje, kali vychodziła asnoŭnaja častka sieryjała. Tamu ŭ sotni niama, naprykład, «Kłana Saprana» — adnaho z samych viadomych amierykanskich sieryjałaŭ svajho času. Jon startavaŭ u 1999 hodzie i pavodle ŭmoŭ hałasavańnia prosta nie moh udzielničać.

Što trapiła ŭ pieršuju piaciorku

Pieršaje miesca zaniała amierykanskaja televizijnaja kryminalnaja drama «Va ŭsie ciažkija» (Breaking Bad). Sieryjał vychodziŭ z 2008 pa 2013 hod i raspaviadaŭ historyju školnaha nastaŭnika chimii Uołtera Uajta. Daviedaŭšysia, što ŭ jaho rak, jon vyrašaje zaniacca vytvorčaściu mietamfietaminu, kab zabiaśpiečyć siamju hrašyma paśla svajoj śmierci. Ale toje, što pačynajecca jak adčajnaja sproba vyratavać blizkich ad finansavych prablem, pastupova pieratvaraje hałoŭnaha hieroja ŭ bujnoha hulca złačynnaha śvietu.

Na druhim miescy amierykanskaja televizijnaja palicejskaja drama «Prasłuchoŭka» (The Wire), jakaja vychodziła ŭ 2002—2008 hadach. Sieryjał Devida Sajmana pačynajecca z supraćstajańnia palicyi Bałtymara i miascovych narkahandlaroŭ, adnak z kožnym siezonam stanovicca ŭsio bolš šyrokaj historyjaj pra žyćcio vialikaha amierykanskaha horada. U centry ŭvahi akazvajucca nie tolki palicyja i złačyncy, ale i palityki, škoły, partovyja rabočyja i žurnalisty.

Treciaje miesca zaniali «Varjaty» (Mad Men) — amierykanski dramatyčny sieryjał, jaki vychodziŭ z 2007 pa 2015 hod. Jaho dziejańnie razhortvajecca ŭ Ńju-Jorku 1960‑ch hadoŭ u śviecie rekłamnaha biznesu. Hałoŭny hieroj Don Drejpier — paśpiachovy i talenavity rekłamist, za biezdakornym źniešnim vobrazam jakoha chavajucca tajamnicy minułaha i składanyja adnosiny z samim saboj i navakolnymi.

Na čaćviortym miescy amierykanski satyryčny kamiedyjna-dramatyčny sieryjał «Spadkajemcy» (Succession), jaki vychodziŭ u 2018—2023 hadach. U centry siužeta siamja Rojaŭ, jakaja vałodaje vielizarnaj miedyjaimpieryjaj. Jaje kiraŭnik Łohan Roj stareje, ale nie śpiašajecca pieradavać uładu, a jaho dzieci pačynajuć baraćbu za kantrol nad siamiejnym biznesam. Sieryjał spałučaje siamiejnuju dramu, čornuju kamiedyju i satyru na śviet vialikich hrošaj i ŭłady.

Piatym staŭ brytanski kamiedyjna-dramatyčny sieryjał «Dreń» (Fleabag), jaki vychodziŭ u 2016—2019 hadach. Hałoŭnaja hierainia sprabuje naładzić žyćcio paśla asabistaj trahiedyi, raźbirajučysia ź siamiejnymi kanfliktami, adnosinami, pačućciom viny i ŭłasnymi pamyłkami. Usiaho vyjšła dva karotkija siezony, adnak hetaha chapiła, kab sieryjał zaniaŭ piataje miesca ŭ hałasavańni.

Chto jašče ŭvajšoŭ u top-30

Nie mienš viadomyja sieryjały sustrakajucca i dalej u rejtynhu. Naprykład, «Hulnia tronaŭ» zaniała šostaje miesca, amierykanski «Ofis» — 11-je, «Čarnobyl» — 19-je, a «Lepš telefanujcie Sołu» — 27-je.

U top-30 uvohule sabralisia vielmi roznyja prajekty — ad fentezi i histaryčnych dram da palityčnaj satyry, čornaj kamiedyi i navukovaj fantastyki. Pryčym pobač z užo zavieršanymi sieryjałami ŭ śpisie jość i tyja, što praciahvajuć vychodzić: satyryčnaja kamiedyjnaja drama «Bieły łotas», fantastyčnaja antałohija «Čornaje lusterka» i navukova-fantastyčny tryler «Raździaleńnie».

Top-30 sieryjałaŭ:

1. «Va ŭsie ciažkija» (Breaking Bad) — 2008—2013

2. «Prasłuchoŭka» (The Wire) — 2002—2008

3. «Varjaty» (Mad Men) — 2007—2015

4. «Spadkajemcy» (Succession) — 2018—2023

5. «Dreń» (Fleabag) — 2016—2019

6. «Hulnia tronaŭ» (Game of Thrones) — 2011—2019

7. «Vice-prezident» (Veep) — 2012—2019

8. «Studyja 30» (30 Rock) — 2006—2013

9. «Utajmuj svoj entuzijazm» (Curb Your Enthusiasm) — 2000—2024

10. «Atłanta» (Atlanta) — 2016—2022

11. «Ofis» (The Office, ZŠA) — 2005—2013

12. «Zatrymka ŭ raźvićci» (Arrested Development) — 2003—2019

13. «Dziaŭčaty» (Girls) — 2012—2017

14. «Ahni načnoj piatnicy» (Friday Night Lights) — 2006—2011

15. «Klijent zaŭsiody miortvy» (Six Feet Under) — 2001—2005

16. «Ofis» (The Office, Vialikabrytanija) — 2001—2003

17. «Amierykancy» (The Americans) — 2013—2018

18. «Ja mahu źniščyć ciabie» (I May Destroy You) — 2020

19. «Čarnobyl» (Chernobyl) — 2019

20. «Karona» (The Crown) — 2016—2023

21. «Bieły łotas» (The White Lotus) — z 2021 hoda

22. «Zastacca ŭ žyvych» (Lost) — 2004—2010

23. «Viartańnie» (The Comeback) — 2005—2026

24. «Dedvud» (Deadwood) — 2004—2006

25. «Pakinutyja» (The Leftovers) — 2014—2017

26. «Čornaje lusterka» (Black Mirror) — z 2011 hoda

27. «Lepš telefanujcie Sołu» (Better Call Saul) — 2015—2022

28. «Braty pa zbroi» (Band of Brothers) — 2001

29. «Kjej i Pił» (Key & Peele) — 2012—2015

30. «Raździaleńnie» (Severance) — z 2022 hoda

Z usim top-100 najlepšych sieryjałaŭ XXI stahodździa pavodle vynikaŭ apytańnia možna aznajomicca na sajcie The New York Times.

• 8
• 2
• 3
• 4
• 1
• 1
• 1
• 0