Na rendarach — adno, u realnaści — inšaje. Žychary minskaha «Paŭnočnaha bieraha» źbiantežanyja vyhladam svajho dvara
U sacsietcy Threads abmiarkoŭvajuć dvarovuju terytoryju doma «Eden» u kvartale «Paŭnočny bierah», jakaja na rekłamnych brašurach vyhladała ŭražliva, ale ŭ realnaści akazałasia inšaj, piša «Anłajnier». Zamiest avalnaj dziciačaj placoŭki ź viarovačnym haradkom — «pramavuholniki» z arelami, zamiest sadu ŭ kviecieni — ścipłyja hradki. Jak zabudoŭščyk tłumačyć takija mietamarfozy?
Temu padniała žycharka kvartała Maryna:
«Kali my vybirali kvateru, u brašury zabudoŭščyka byŭ pakazany voś taki varyjant uparadkavańnia dvara: paŭnavartasnaja hulniavaja zona, viarovačny haradok, mnostva hulniavych elemientaŭ, vialikaja kolkaść zielaniny i ŭvohule davoli nasyčanaja prastora».
A voś fota dvara, jaki atrymaŭsia ŭ realnaści:
Dziaŭčyna praciahvaje:
«Zabudoŭščyk tłumačyć, što vyjava ŭ brašury — heta tolki prykładnaja kancepcyja ŭparadkavańnia. Akiej. Ale tady ŭźnikaje pytańnie: a dzie sama kancepcyja?
Kali paraŭnać vizualizacyju z tym, što ŭ vyniku atrymałasia, adčuvańnie takoje, byccam heta dva roznyja prajekty.
Na faktyčnaj placoŭcy šmat svabodnaj prastory, a hulniavoje napaŭnieńnie davoli ścipłaje. I asabliva prykmietna heta na fonie taho, što było pakazana patencyjnym kupcam.
Asobnaja višańka na torcie — hulniavaja kanstrukcyja. Dahetul nichto tołkam nie zrazumieŭ, jak na joj pavinny hulać dzieci daškolnaha ŭzrostu: asnoŭnyja elemienty raźmieščanyja dastatkova vysoka. A dla dziaciej starejšaha ŭzrostu takaja kanstrukcyja, miarkujučy pa ŭsim, užo nie ŭjaŭlaje asablivaj cikavaści.
I voś u mianie sapraŭdy pytańnie da zabudoŭščyka: kali heta była «prykładnaja kancepcyja», to nakolki ŭvohule moža adroźnivacca realizavany dvor ad taho, što pakazvajuć pry prodažy kvater?»
U kamientarach Marynu padtrymali. Voś mierkavańnie jašče adnoj žycharki novabudoŭli:
«Ja taksama žyvu ŭ domie «Eden» i vielmi rasčaravanaja hetaj žachlivaj placoŭkaj. U nas vielizarny dvor, jak možna było tak jaho sapsavać? Čamu dvary, značna mienšyja za naš, ukamplektavanyja ležakami, arelami? Jak možna było pastavić horku biez narmalnaj leśvicy, dla jakoha ŭzrostu jana pryznačanaja i jak na jaje karaskacca? Vielmi sumna».
Jość i tyja, chto ličyć čakańni dolščykaŭ naiŭnymi:
«To-bok historyja pra rendary z handołami i parkami vam padałasia prosta vyklučeńniem? Luby zabudoŭščyk u RB mianiaje prajekt u chodzie budaŭnictva tak, jak jamu zručniej i tańniej. Vieryć u kazki zabudoŭščyka vy vybrali sami».
Kamientaryj zabudoŭščyka
Zabudoŭščyk žyłoha kompleksu «Paŭnočny bierah» daŭ aficyjny kamientaryj pa situacyi:
«Lubyja publičnyja vyjavy i vizualizacyja, raźmieščanyja na aficyjnym sajcie i ŭ infarmacyjnych materyjałach (brašurach, rendarach, praśpiektach, bukletach, makietach, 3D‑madelach, schiemach, inšych hrafičnych materyjałach), nie źjaŭlajucca publičnaj afiertaj, rekłamnym abiacańniem abo harantyjaj poŭnaj adpaviednaści abjekta budučaha budaŭnictva vyjaŭlenym materyjałam, nie źjaŭlajucca častkaj prajektnaj dakumientacyi abo infarmacyjaj, jakaja źmiaščajecca ŭ joj, a taksama nosiać umoŭny, daviedačny i ilustracyjny charaktar i nakiravanyja na pieradaču mahčymaj kancepcyi i mierkavanaj atmaśfiery budučaha žyłoha kvartała. Biezumoŭnym pryjarytetam dla ŭdzielnikaŭ budaŭnictva źjaŭlajecca prajektnaja dakumientacyja.
Na siońniašni dzień uparadkavańnie dvarovaj terytoryi doma «Eden» vykanana ŭ adpaviednaści z zajaŭlenym vobrazam prajekta: stvoranyja funkcyjanalnyja zony dla dziaciej roznych uzrostaŭ i adpačynku, vykanana azielanieńnie, praduhledžanyja miescy dla zachoŭvańnia rovaraŭ.
Zabudoŭščyk maksimalna prytrymlivajecca pradstaŭlenaj na rendarach kancepcyi. Razam z tym vizualnyja materyjały, padrychtavanyja na etapie prezientacyi prajekta, adlustroŭvajuć pierš za ŭsio architekturnuju kancepcyju i ahulnuju zadumu ŭparadkavańnia, a nie harantujuć identyčnaść kožnaha elemienta realizavanaj terytoryi».
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ9
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ
Biełarus-vachtavik na Jamale stvaraje pieśni na biełaruskaj movie z dapamohaj ŠI. «Raniej muzyka była zakrytym kłubam. Niejrasietki adčynili hetyja dźviery z nahi»1919
Kamientary