«Potym budziem uspaminać Pryhožyna jak hieroja». Chakiery apublikavali mierkavanuju pierapisku Babiča i Piaskova
Chakierskaja hrupa Black8Mirror zajaviła, što atrymała archiŭ rasijskaha čynoŭnika, byłoha pasła Rasii ŭ Biełarusi Michaiła Babiča i apublikavała niekalki frahmientaŭ jaho mierkavanaj pierapiski z pres-sakratarom Uładzimira Pucina Dźmitryjem Piaskovym.
Pavodle Black8Mirror, archiŭ Babiča zajmaje bolš za 21 HB i źmiaščaje materyjały za pieryjad z 2020 hoda da žniŭnia 2026-ha. U adkrytym dostupie chakiery raźmiaścili tolki asobnyja frahmienty i skrynšoty.
Michaił Babič — były paŭnamocny pradstaŭnik prezidenta Rasii ŭ Pryvołžskaj fiederalnaj akruzie i były pasoł Rasii ŭ Biełarusi (2018-2019). Z 2021 hoda — namieśnik dyrektara rasijskaj Fiederalnaj słužby vajskova-techničnaha supracoŭnictva.
«Čysty ekspromt» Takajeva
Adzin z apublikavanych frahmientaŭ adnosicca da 25‑26 lipienia 2026 hoda.
25 lipienia padčas sustrečy z Pucinym u Omsku prezident Kazachstana Kasym-Žamart Takajeŭ niečakana zakranuŭ vajnu va Ukrainie. Jon zajaviŭ, što jaje pryroda «nie zusim zrazumieła» mnohim, u tym liku Kazachstanu, i prapanavaŭ «zamarozić» kanflikt.
U pierapiscy, apublikavanaj Black8Mirror, Babič pytajecca ŭ surazmoŭcy, paznačanaha jak Dźmitryj Piaskoŭ, ci byŭ vystup Takajeva ŭzhodnieny zahadzia.
«Čysty ekspromt», — adkazvaje toj i dadaje, što Takajeva «niechta paprasiŭ heta skazać». Voś tolki pytańnie, chto: «ukraincy, amierykancy ci niechta znutry».
«Nu tak biaśpiečna»
Prapiska praciahvajecca na nastupny dzień, kali ŭ Sankt-Pieciarburhu adznačali Dzień VMF. Śviatkavańnie druhi hod zapar prajšło biez hałoŭnaha vajenna-marskoha paradu ŭ Pieciarburhu.
26 lipienia Pucin pryjechaŭ na aŭtamabili ŭ Hałoŭnaje Admirałciejstva. Zamiest tradycyjnaha ahladu karabloŭ Pucina vitała rota hanarovaj varty, a pierad marakami jon vystupaŭ u dvary Admirałciejstva na fonie vialikaha baniera z vyjavaj atamnaj padvodnaj łodki.
U apublikavanaj pierapiscy «Babič» rezka krytykuje farmat mierapryjemstva:
«U zasranym dvoryku Admirałciejstva zamiest mora — banier, zamiest vojskaŭ — rota hanarovaj varty z suchaputnych sałdat… Dzima, chto hetuju chreń prydumaŭ, kudy jany jaho ciahnuć…»
«Piaskoŭ» adkazvaje:
«Nu dyk biaśpiečna».
«Naŭrad ci možna dapamahčy samahubcu»
Najbolš cikavy z apublikavanych Black8Mirror frahmientaŭ datujecca 24 maja 2023 hoda, prykładna za miesiac da miaciažu PVK «Vahnier» i za try miesiacy da hibieli Jaŭhiena Pryhožyna.
U pierapiscy «Babič» pierasyłaje surazmoŭcu tekst ź pierakazam vykazvańniaŭ Pryhožyna. U im havorycca, što źniavoleńnie Alaksieja Navalnaha, na dumku kiraŭnika «Vahniera», «razbeściła» karumpavanych čynoŭnikaŭ. Raniej jany nibyta bajalisia trapić u rasśledavańni Navalnaha, što ŭskładniała im vykarystańnie skradzienych hrošaj.
Na skrynšocie hety tekst vyhladaje jak pierasłanaje paviedamleńnie ad Mikałaja Piatrova. Takija ž imia i proźvišča maje viadomy rasijski palitołah. Pry hetym analiz vydańnia pakazaŭ, što sam tekst pachodzić z telehram-kanała «JEŽ», jaki ŭ mai 2023 hoda nazyvaŭsia Brief. Adpaviedny post paźniej byŭ vydaleny.
Na pierasłany tekst akaŭnt «Piaskova» adkazvaje:
«Trahiedyja ŭ tym, što ŭsio heta praŭda. I ŭsie my tak ci inakš pra heta havorym… Tolki ličycca, što pra heta nielha havaryć publična».
Dalej razmova pierachodzić niepasredna da Pryhožyna. «Piaskoŭ» piša:
«Navošta jon heta robić, nie viedaju. Pazaŭčora hadzinu ź im skandaliŭ. Užo biessensoŭna. Jon ličyć, što ŭsio nastolki drenna, što treba niešta rabić…»
«Babič» adkazvaje, što jamu «ŭpieršyniu zdajecca, što jon maje racyju», i pytajecca, ci nie varta «pačać jamu dapamahać».
U adkaz «Piaskoŭ» piša:
«Naŭrad ci možna dapamahčy samahubcu. Potym budziem uspaminać jaho jak hieroja i raskazvać pra jaho dzieciam».
Pavodle apublikavanaha skrynšota, hetaja razmova adbyłasia 24 maja 2023 hoda.
Za dzień da jaje, 23 maja, było apublikavana vialikaje intervju Pryhožyna. U im jon, siarod inšaha, śćviardžaŭ, što zamiest zajaŭlenaj «demilitaryzacyi» Rasija faktyčna spryjała militaryzacyi Ukrainy, a taksama razvažaŭ pra rolu rasśledavańniaŭ Navalnaha ŭ strymlivańni karupcyi.
Roŭna praź miesiac paśla daty na skrynšocie Black8Mirror, 24 červienia, siły PVK «Vahnier» zaniali vajskovyja abjekty ŭ Rastovie-na-Donie i rušyli ŭ bok Maskvy. Miaciež zakončyŭsia ŭ toj ža dzień paśla damoŭlenaściaŭ ab spynieńni ruchu kałon.
23 žniŭnia 2023 hoda Pryhožyn zahinuŭ padčas katastrofy samalota ŭ Ćviarskoj vobłaści.
Ciapier čytajuć
Rasijanie sapraŭdy stali čaściej kuplać nieruchomaść u Biełarusi? Voś što raskazvajuć ryełtary20
Rasijanie sapraŭdy stali čaściej kuplać nieruchomaść u Biełarusi? Voś što raskazvajuć ryełtary
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»1111
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»11
Niebaraka ź Lachavičaŭ źnik «na SVA» ŭžo na treci dzień, a ŭ baraćbie za hrabavyja sčapilisia siastra, sužycielka i žonka — z čatyrma dziećmi, ale čužymi88
Kamientary
Babki i dohovorniaki pochoronili russkij patriotičieskij prahmatizm.