Na płoščy 1000-hodździa Viciebska ŭstanoviać fłahštok «dla patryjatyčnaha ŭzbahačeńnia»
Na sajcie harvykankama źjaviłasia abviestka pra «papiaredniaje infarmavańnie» žycharoŭ nakont novaha haradskoha abjekta pad nazvaj «Fłahštok na płoščy 1000-hodździa Viciebska». Jaho dakładnyja pamiery jašče nie vyznačany. Inicyjatary ŭźviadzieńnia havorać pra kanstrukcyju «vyšynioj ad 50 da 65 mietraŭ».
«Admova ad realizacyi prajekta nie dazvolić realizavać zhadanyja vyšej mety i pryviadzie da adsutnaści zony patryjatyčnaha ŭzbahačeńnia i adpačynku nasielnictva», — havorycca ŭ materyjałach «papiaredniaha infarmavańnia».
Ź inšych mudrahielistych farmulovak vynikaje, što haradžan spaviaščajuć nie tolki pra fłahštok, ale i pra «arhanizacyju adpaviednaha dobraŭparadkavańnia dla ŭračystych cyrymonij i ekskursij turystaŭ, a taksama budaŭnictva nieabchodnych vonkavych inžyniernych sietak u achoŭnaj zonie historyka-kulturnaj kaštoŭnaści «Histaryčny centr Viciebska».
Kali bolš kankretna, to ŭ histaryčnym centry płanujuć ustalavać «nie mieniej za dva śviatłodyjodnyja ekrany, kanstrukcyju dla raźmiaščeńnia hierba Respubliki Biełaruś i hukavaha abstalavańnia dla prasłuchoŭvańnia himna, stełu z nazvaj płoščy».
Płošča Tysiačahodździa znachodzicca ŭ centralnaj častcy horada ta terytoryi byłoha Nižniaha zamka, jaki isnavaŭ u XIV—XVIII st. Da 1950-ch tut była ščylnaja haradskaja zabudova, jakuju pastupova znosili. Paśla ŭźviadzieńnia budynka dramteatra imia Jakuba Kołasa płošču, jakaja ŭtvaryłasia pierad im, nazvali Teatralnaj. Nazva była źmieniena ŭ 1974 hodzie, kali adznačałasia 1000-hodździe Viciebska.
Na płoščy, jakaja častkova zabrukavanaja, a častkova ŭjaŭlaje saboj zialony hazon, siońnia mieściacca adrestaŭravany chram XII st. — Dabravieščanskaja carkva i draŭlanaja carkva sv. Alaksandra Nieŭskaha. Taksama ŭ 2016 hodzie tut pastavili skulpturnuju kampazicyju, jakaja ŭvasablaje pryjezd Alaksandra Nieŭskaha ŭ Viciebsk da žonki i syna. Dzieści tut płanujuć ustanavić i ideałahičnyja abjekty.
«Papiaredniaje infarmavańnie» zusim nie aznačaje, što ŭłady vyrašyli paraicca ź miascovymi žycharami nakont uvasableńnia hetaj idei. Viciablan zaprosiać tolki na hramadskaje abmierkavańnie spravazdačy ab uździejańni abjekta na navakolnaje asiarodździe, jakoje budzie praciahvacca z 26 śniežnia da 25 studzienia ŭžo nastupnaha hoda.
Tady i prademanstrujuć, jak majuć vyhladać fłahštok, steła, śviatłodyjodnyja ekrany i ŭsio inšaje, što źbirajucca ŭźvieści ŭ histaryčnym centry horada.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary