Što adbyvajecca ŭ Kabakach paśla samahubstva stvaralnika prytułku dla žyvioł
Paśla trahičnaj śmierci Siarhieja Niachienia — stvaralnika prytułku dla sabak u vioscy Kabaki Biarozaŭskaha rajona — biez pryhladu zastalisia bolš za 40 žyvioł. Apieratyŭna prystroić ich zdavałasia nierealnym. Ale amal usie ŭžo znajšli novy dom. Ciapier u Kabakach zastałosia ŭsiaho čatyry sabaki — za dvuma ź ich chutka pavinny pryjechać novyja haspadary.
Pachavali Siarhieja ŭ minułuju subotu. Ale bulinh, z-za jakoha, pa mierkavańni znajomych, jon nakłaŭ na siabie ruki, na hetym nie skončyŭsia. U tyktoku pad roznymi videa z uspaminami pra dziejnaść mužčyny rehularna źjaŭlajucca kamientaryi ad ananimnych akaŭntaŭ, jakija imknucca abrazić jaho. Naprykład: «Narmalny mužčyna pavinien pa 12 hadzin pracavać, adkul u jaho voźmiecca čas na sabak?!» Chtości sprabuje ŭčapicca za toje, što ŭ Siarhieja byli nie samyja prostyja adnosiny ź blizkimi.
«Našaj Nivie» stała viadoma, što niekalki dziaržaŭnych ŚMI rychtujuć vypusk niehatyŭnych tekstaŭ pra stvaralnika prytułku ŭ Kabakach. Całkam imavierna, akcent zrobiać na tym, što apošnim časam Siarhiej mieŭ prablemy z ałkaholem. U svaim tyktoku za niekalki tydniaŭ da samahubstva jon ščyra raspaviadaŭ pra toje, što z-za žyćcia ŭ pastajannym stresie moh vypić piva ci harełki.
Ale heta nie admianiaje toj fakt, što Siarhieja ckavali z-za jaho lubovi da žyvioł. Starasta ahraharadka Kabaki Anatol Ramanovič rehularna vyklikaŭ milicyju dy roznyja pravierki da niazručnaha susieda. U adnym sa svaich videa Siarhiej śćviardžaŭ, što starasta pahražaŭ jaho paviesić i atrucić sabak.
Vałanciory z roznych krain zapisali videazvarot da biełaruskaj prakuratury z patrabavańniem zavieści kryminalnuju spravu za daviadzieńnie da samahubstva.
Tym časam, losy čatyrochłapych padapiečnych składajucca značna ščaśliviej, čym los čałavieka, jaki padzialiŭsia ź imi domam. Z usioj krainy ludzi jeduć, kab zabrać «chvościkaŭ Siarhieja». U tyktoku šmat videa, dzie novyja haspadary radasna abdymajuć hadavancaŭ.
Pieršaj zabrali ščaniuka-dziaŭčynku — samuju aktyŭnuju z raznamasnaj kampanii. Pa jaje pryjechała siamja z dvuma dziećmi ź Ivacevičaŭ. Na videa bačna, što ŭsie ledź strymlivajuć ślozy radaści, trymajučy na rukach ščaniuka. Nazvali sabačku Žulka.
A sabaka Baradulka ŭ chutkim časie razam ź siamjoj pierajedzie žyć u Vielikabrytaniju (i mabyć źmienić mianušku na Džesi) — ale pakul budzie abžyvacca ŭ minskaj kvatery.
Adna z vałanciorak, jakaja znachodzicca za miažoj, paviedamiła «Našaj Nivie» pra toje, što praktyčna ŭsich sabak udałosia razdać. Ciapier u prytułku zastalisia čatyry sabaki, za dvuma ź jakich u bližejšy čas pavinny pryjechać novyja haspadary.
Maleńkaha sabačku Klopu, jaki ŭsiudy biehaŭ za Siarhiejem (jon łaskava nazyvaŭ hadavanca Klopa-zaŭchozicha, tamu što toj imknuŭsia ŭsio prakantralavać), chacieli zabrać u Minsk. Adnak adna sa svajačak Siarhieja vyrašyła pakinuć sabačku ŭ siabie ŭ pamiać pra zahinułaha. Klopa, jak i raniej, bieskłapotna biehaje pa chacie, padstaŭlajučy žyvocik dla časańnia, pačuŭšy zvykłuju kamandu: «Klopa, pakažy puzika!»
Čytajcie taksama:
«Čamu vy na mianie nakinulisia?» Na Brestčynie zabiŭ siabie stvaralnik sabačaha prytułku
«Treciaj zimy Bim moža nie pieranieści». Pad Maładziečnam sabaka-achoŭnik druhi hod žyvie na łancuhu
Ciapier čytajuć
Cichanoŭski prapanavaŭ radykalna pierahledzieć stratehiju dla Biełarusi36
Kamientary
https://dck8xvlq18iei.cloudfront.net/331590