«Nie apraŭdała nadziej». Palaki patłumačyli, čamu prypynili vizavuju prahramu Poland. Business Harbour
Ministerstva zamiežnych spraŭ Polščy vydała aficyjnaje tłumačeńnie adnosna taho, čamu z 26 studzienia spyniajecca vydača vizaŭ Poland. Business Harbour.
U paviedamleńni polskaha MZS havorycca, što rašeńnie ab prypynieńni prahramy Poland. Business Harbour pryniaŭ ministr Radasłaŭ Sikorski. Jak paviedamlajecca, prahramu nie adnoviać, «pakul nie buduć pryniatyja pastanovy dla zabieśpiačeńnia naležnaj pravierki kampanij i zamiežnikaŭ, jakija źjaŭlajucca jaje bienieficyjarami».
«Pavodle acenki Ministerstva zamiežnych spraŭ, prahrama Poland. Business Harbour nie apraŭdała ŭskładzienych na jaje nadziej. Siarod inšaha, u hramadskaj prastory byli vykazanyja piarečańni z nahody vykarystańnia viz, vydadzienych u ramkach prahramy, u metach, niesumiaščalnych ź jaje ŭmovami», — padkreślivajuć polskija dypłamaty.
Inšaziemcy (u tym liku biełarusy), jakija pretendujuć na pracu ŭ IT-siektary ŭ Polščy, pa-raniejšamu mohuć padavać zajavy na polskuju vizu na ahulnych padstavach, havorać u MZS. Dla pradstaŭnikoŭ biznes-siektara (asabliva ŭ halinach, najbolš zapatrabavanych polskaj ekanomikaj) abiacajuć spraščeńnie vizavych pracedur.
Pra zakryćcio prahramy Poland. Business Harbour stała viadoma siońnia. Biełarusy, čyje dakumienty pajšli ŭ vizavyja centry, ale nie paśpieli dajści da polskich konsulstvaŭ, siońnia atrymali paviedamleńni z prośbaj zabrać ich.
Prahrama Poland Business Harbour dapamahała śpiecyjalistam IT-śfiery, startapam, a taksama cełym kampanijam pierajechać u Polšču. Kaardynatarami prahramy byli Ministerstva raźvićcia, Polskaje ahienctva inviestycyj i handlu, GovTech Polska, Kancylaryja staršyni ŭrada, Ministerstva zamiežnych spraŭ, Polskaje ahienctva raźvićcia pradprymalnictva i fond Startup Hub Poland.
Prahrama ŭklučała vydaču nacyjanalnaj vizy D23, jurydyčnuju padtrymku pry pierajeździe, dapamohu ŭ kantaktach z orhanami samakiravańnia, SEZ, inviestarami, a taksama hranty.
Sotni rubloŭ, kab efiektna daviedacca poł budučaha dziciaci: biełarusy robiać usio bolš maštabnyja hiendar-paci3
Kamientary