«Ja, moža, i nie mahu pajechać u vaš zasrany Paryž…» Lebiedzievu zusim nie bambić u adpačynku
Pahladzieli, dzie adpačyvajuć uzimku prychilnicy režymu i čym dzielacca ŭ sacyjalnych sietkach. Spojler: niechta z zorak biełaruskaha telebačańnia śćviardžaje, što pakutuje za miažoju, a niechta sprabuje pierakanać siabie, što nie chvalujecca z-za sankcyj.
Ksienii Lebiedzievaj navat u adpačynku nie atrymlivajecca vykinuć pracu z hałavy. Zamiest taho, kab, ležačy na piasočku ŭ Dubai, słuchać, jak pobač pleščacca Piersidski zaliŭ, jana pa zvyčcy plujecca jadam u bok Zachadu.
«Ja, moža, i nie mahu pajechać (časova) u vaš zasrany Paryž ci Varšavu, ułasna, i nie imknusia, nam i ŭ Dubajach niadrenna…» − napisała prapahandystka ŭ instahramie i dadała chešteh #mysankciiviertieli. Adrazu bačna, što čałaviek sapraŭdy nie pieražyvaje, što nie moža pajechać u Jeŭropu.
Padtrymać Lebiedzievu ŭ kamientaryi pryjšła jaje susiedka pa ŭkrainskaj bazie «Miratvorac» Julija Arciuch. «Kajfuj!» − paraiła žonka aficera, jakuju vykinuli z abojmy prapahandystaŭ.
Pra što jašče dumaje 36-hadovaja Ksienija Lebiedzieva na plažy? Apublikavaŭšy svajo fota ŭ kupalniku, jana napisała: «Sonca, mora, plaž i nijakich bečebešnikaŭ — pryhažość».
Śpiavačka Alona Łanskaja viadzie siabie bolš strymana. Z adpačynku ŭ tym ža Dubai jana zapościła ŭsiaho adzin zdymak. Artystka ŭ asnoŭnym dzialiłasia videa ŭ storys.
A voś novaja viadučaja BT Nasta Kraŭčanka (studentka Instytuta teałohii BDU i śpiavačka) palacieła na Kubu. Dziaŭčyna dzialiłasia ŭražańniami ad «vostrava svabody».
«Viedajecie, na samoj spravie tut vielmi stromna. Realnyja ŭmovy žyćcia prosta ahidnyja. Dziakuj, što ja naradziłasia ŭ Biełarusi», − raskazvała jana ŭ storys u pieršyja dni adpačynku i raiła suajčyńnikam dziakavać bohu za toje, što jany žyvuć u Biełarusi.
Ale potym Nasta ŭsio ž acaniła Kubu i na raźvitańnie z vostravam napisała, što hetaja pajezdka stała najlepšaj u jaje žyćci: «I tut, na Kubie, ja zrazumieła, jak važna šanavać kožnuju sustreču i kožnaje imhnieńnie. Nasamreč navat karotkaje znachodžańnie na inšym kantyniencie moža źmianić žyćcio i ŭ cełym staŭleńnie da jaho».
Śpiavačka taksama rastłumačyła, što na niekatorych fota ŭ jaje zapłakanyja vočy — ale heta ad ščaścia.
Ciapier čytajuć
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)1212
Kamientary