U Junackim čempijanacie ZŠA Stanisłava Łapkiesa pryznali najlepšym bramnikam.
Całkam mahčyma, nieŭzabavie ŭ Biełarusi źjavicca svoj pradstaŭnik i ŭ Hałoŭnaj lizie sokiera (MLS). U 2019 hodzie ŭ Akademiju «Kałambus Kru» pastupiŭ hałkipier Stanisłaŭ Łapkies (2006 h.n.), syn viadomaha biełaruskaha fiechtavalščyka, udzielnika Alimpijskich hulniaŭ Dźmitryja Łapkiesa, jaki ŭ kancy minułaha dziesiacihodździa pierajechaŭ u ZŠA, piša football.by.
Łapkies-małodšy — vychavaniec minskaha «Dynama», dzie byŭ kapitanam u kamandzie svajho ŭzrostu. Paśla pierajezdu ŭ Štaty jaho baćka nazyvaŭ uzrovień padrychtoŭki ŭ Minsku i Kałambusie «prorvaj».
Adnak Stas chutka ŭpisaŭsia. Ź junackaj kamandaj «Kałambusa» (U-17) u 2022 jon dajšoŭ da finału MLS NEXT (pa sutnaści, hałoŭny junacki čempijanat ZŠA), byŭ nazvany najlepšym bramnikam Kubka MLS NEXT u hetym uzroście i navat udzielničaŭ u matčy ŭsich zorak turniru.
Z maja 2022 hoda jon padpisaŭ amatarski kantrakt z «Kałambusam-2», jaki vystupaje ŭ MLS Next Pro. Heta treciaja pa ijerarchii liha ŭ ZŠA. Kali pravodzić anałohii, bližej za ŭsio da jaje naš čempijanat dubloraŭ.
U krasaviku 2023-ha jon debiutavaŭ u spabornictvie z «suchoj» pieramohi nad druhoj kamandaj «Ńju-Inhlend Revalušn». U siezonie-2023 pravioŭ 13 matčaŭ u rehularnym čempijanacie, 5 ź jakich abaraniŭ na nul, i 4 u płej-of (2 na nul).
Jaho kamanda zaniała treciaje miesca ŭ «rehularcy « Uschodniaj kanfierencyi MLS Next Pro, a zatym dajšła da finału płej-of, dzie sastupiła «Ościnu» (1:3).
A ŭ kastryčniku Łapkies staŭ adnym ź piaci futbalistaŭ kłuba, jakija padpisali z «Kałambusam-2» prafiesijnyja kantrakty.
Voś što kazaŭ pra jaho ŭ kastryčniku paśla padpisańnia hienieralny dyrektar «Kałambus Kru II» Kory Rej: «Stas — šmatspadzieŭny małady bramnik, jaki damohsia vialikich pośpiechaŭ u našaj Akademii i ŭ druhoj kamandzie. My rady padpisać ź im jaho pieršy prafiesijny kantrakt, čakajem jaho dalejšaha raźvićcia».
A voś padborka sejvaŭ Łapkiesa ad Instagram lihi.
Siezon-2024 Łapkies pačnie, chutčej za ŭsio, taksama ŭ druhoj kamandzie. Adnak pa chodzie čempijanatu pry takim prahresie ništo nie pieraškodzić «Kałambusu» pry patrebie padniać jaho ŭ hałoŭnuju kamandu.
Ciapier čytajuć
«U vyniku jon skazaŭ mnie: «Chopić mianie šantažavać, ja chaču palubavacca hetymi drevami». Aksana Kołb raskazała, pra što razmaŭlała sa Statkievičam na miažy88
Kamientary