Kitajec zarabiŭ za miesiac amal 9 tysiač dalaraŭ, nazirajučy za abłokami

Vakansiju 8 lipienia abviaściŭ turystyčny rajon hary Łaacziuń u pravincyi Chenań. Praca była raźličanaja z 16 lipienia da 15 žniŭnia. Akramia zarobku, supracoŭniku dali biaspłatnaje žyllo.

Hara Łaacziuń — adno ź viadomych śviatych miescaŭ daasizmu ŭ Kitai, historyja jakoha naličvaje bolš za 2000 hadoŭ. Pavodle tradycyi, mienavita tut u VI stahodździ da našaj ery žyŭ zasnavalnik fiłasofskaj škoły daasizmu Łaa-czy. Hara taksama słavicca krajavidami, kali husty tuman utvaraje svojeasablivaje «mora abłokaŭ».

Pavialičyć

Pry hetym Łaacziuń maje najvyšejšy ŭ Kitai status turystyčnaj słavutaści — 5A. Inšaziemcaŭ tudy, adnak, nie puskajuć praź blizkaść da vajskovaj bazy.

Niezvyčajnaja vakansija chutka stała virusnaj u kitajskich sacyjalnych sietkach. Na jaje pretendavali bolš za 3500 čałaviek. Kandydaty pavinny byli publikavać svaje videa z admysłovymi cheštehami, a pieramožcu vybirali z ulikam papularnaści jaho rolika, kolkaści łajkaŭ i pierapostaŭ, a taksama jakaści samoha videa.

U vyniku pracu atrymaŭ 23‑hadovy Li Syčeń z Chenani, jaki niadaŭna skončyŭ navučańnie pa śpiecyjalnaści, źviazanaj z elektronnaj kamiercyjaj. Jon abyšoŭ navat šerah prafiesijnych fatohrafaŭ i staŭ pieršym aficyjnym «naziralnikam za abłokami» na hary.

Padčas pracy Li davodziłasia ŭstavać kala piataj hadziny ranicy. Jon zdymaŭ krajavidy ad pieradśvitalnych hadzin da zachodu sonca, u tym liku śvietłavyja šou, kab sabrać jak maha bolš materyjału z roznych rakursaŭ. Za hety čas jon navučyŭsia lepš zdymać i mantavać videa, zajmacca kolerakarekcyjaj i kiravać dronam.

Pavialičyć

Adnak praca akazałasia nie takoj lohkaj, jak moža zdavacca zboku. Li pryznaŭsia, što spačatku chvalavaŭsia, ci buduć jahonyja roliki karystacca papularnaściu. Asabliva ciažka było ŭ dni z drennym nadvorjem, kali čakanaha «mora abłokaŭ» nie było. Jon nazvaŭ takija momanty sapraŭdnym vyprabavańniem.

Usie aŭtarskija pravy na videazdymki, zroblenyja Li na terytoryi turystyčnaha kompleksu, naležać samomu kompleksu. Pry hetym małady čałaviek paralelna publikavaŭ u svaim asabistym akaŭncie videabłohi pra pracu i ŭłasnyja pieražyvańni. Jahonaja staronka ŭžo nabrała bolš za 6000 padpisčykaŭ.

Niahledziačy na virusnuju papularnaść svajho konkursnaha rolika, Li pakul nie ličyć siabie błohieram-influjensieram. Paśla zakančeńnia niezvyčajnaj raboty jon płanuje znajści pastajannaje miesca pracy, a sacyjalnyja sietki vieści ŭ volny čas.

Pradstaŭnik turystyčnaha rajona Čžan paviedamiŭ, što padobny nabor mohuć pravieści i ŭ budučyni. Na abjekcie ŭžo pracujuć štatnyja videaapieratary, ale administracyja choča atrymlivać śviežy pohlad zboku — svojeasablivaje «treciaje voka», jakoje moža zaŭvažyć toje, što zvyčajnyja supracoŭniki pierastajuć zaŭvažać.

• 0
• 0
• 0
• 0
• 0
• 0
• 0
• 0