Erdahan moža pieradać uładu stvaralniku «Bajraktaraŭ», jakija źniščyli mnostva rasijskich sałdat
Jak piša vydańnie The Wall Street Journal, nastupnym prezidentam Turcyi maje ŭsie šancy stać Sialčuk Bajraktar, ziać Erdahana i adzin sa stvaralnikaŭ znakamitych adnajmiennych bieśpiłotnikaŭ, jakija pakazali siabie va ŭsioj krasie va Ukrainie suprać rasijskaj armii.
Techničny dyrektar i saŭładalnik kampanii pa vytvorčaści vajskovych bieśpiłotnikaŭ «Baykar Makina» Sialčuk Bajraktar staŭ vielmi papularny ŭ krainie i na jaho karyść taksama hulaje toj fakt, što jon žanaty z adnoj z dačok Erdahana.
Vydańnie sa spasyłkaj na krynicy adznačaje, što ŭ tureckich uładnych kołach usio čaściej stali kazać ab pošukach mahčymaha paśladoŭnika Erdahana, asabliva kali toj niadaŭna adkryta zajaviŭ, što «heta jaho apošni prezidencki termin».
Plus da ŭsiaho Sialčuk Bajraktar razam sa svaim bratam Chałukam Bajraktaram (jaki źjaŭlajecca druhim uładalnikam kampanii «Baykar Makina» i jaje hienieralnym dyrektaram) uvachodiać u bližejšaje koła daradcaŭ Erdahana pa mižnarodnych spravach.
«Ja nie zajmajusia aktyŭnaj palitykaj, adnak nie vyklučaju, što mahu bałatavacca na pasadu prezidenta Turcyi, kali mianie ab hetym paprosić moj cieść (Erdahan). Mahčyma, ja b pahadziŭsia», — zajaŭlaŭ Sialčuk Bajraktar vydańniu The Wall Street Journal minułaj vosieńniu.
U apošnija časy pradprymalnik staŭ publična paturać nacyjanalistyčnaj rytorycy Erdahana, asabliva pra «vialikija asmanskija časy» Turcyi, i ŭdzielničać razam ź cieściem u praŭradavych mitynhach suprać apieracyi Izraila ŭ Hazie.
Akramia taho, dziejnaść kampanii «Baykar Makina» pad kiraŭnictvam bratoŭ Bajraktaraŭ vyvieła Turcyju na hanarovaje miesca suśvietnaj areny ŭzbrajeńniaŭ, dazvalajučy joj paŭnavartasna kankuravać z ZŠA, Rasijaj i Kitajem.
Bieśpiłotniki «Bajraktar», naprykład, adyhrali klučavuju rolu ŭ pieršyja miesiacy vajny va Ukrainie, źniščyŭšy vielizarnuju kolkaść rasijskich sałdat na podstupach da Kijeva. A pierad hetym jany zabiaśpiečyli technałahičnaje daminavańnie Azierbajdžana padčas vajny ŭ Nahornym Karabachu 2020 hoda.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury6
Kamientary