Były dziaržministr Nahornaha Karabacha abviaściŭ u turmie haładoŭku 5 krasavika i pierastaŭ vychodzić na suviaź

Syn byłoha dziaržministra niepryznanaj respubliki Nahorny Karabach (ciapier pad kantrolem Azierbajdžana) Rubiena Vardaniana David raspavioŭ telekanału RBK, što jaho baćka abviaściŭ haładoŭku 5 krasavika, paśla hetaha siamja nie mieła mahčymaści ź im źviazacca.

Pa słovach Davida Vardaniana, apošni raz jon bačyŭ baćku asabista da adjezdu ŭ Karabach, u žniŭni 2022 hoda, a razmaŭlaŭ ź im pa telefonie ŭžo paśla aryštu — u minułym listapadzie. Vardanian-starejšy vychodziŭ na suviaź raz na tydzień i razmaŭlaŭ z žonkaj, Vieranikaj Zonabiend. Apošni raz heta adbyłosia ŭ «pieršyja dni krasavika», tady jon raspavioŭ, što źbirajecca abviaścić haładoŭku i pačaŭ admaŭlacca ad ježy.

Paśla hetaha zvankoŭ ad Rubiena Vardaniana nie pastupała. «My baimsia za jahonaje zdaroŭje, za jahony stan. Ja dumaju, što heta nie prosta tak, što jak raz u hety čas jamu nie dali bolš jaho rehularnaha zvanka», — kaža David.

Vardanian-małodšy dadaŭ, što supracoŭniki Čyrvonaha kryža byli ŭ jaho baćki jašče da abviaščeńnia haładoŭki, na dadzieny momant u siamji niama mahčymaści atrymać dakładnyja źviestki ab jaho realnym stanie zdaroŭja.

Rubien Vardanian patrabavaŭ «mižnarodnaj prysutnaści» na sudovym pracesie nad im, jaki pavinien adbycca ŭ mai, raspavioŭ David. Jon padkreśliŭ, što siamja spadziajecca na toje, što pasiadžeńnie adbudziecca, pakolki pieršapačatkova sud pavinien byŭ prajści ŭ studzieni, ale jaho pieranieśli pa pryčynach, jakija siamji nie nazvali.

«Jon zaŭsiody vystupaŭ za vyzvaleńnie ŭsich armianskich pałonnych, jakija ciapier siadziać u Bakinskaj turmie, uklučajučy palitviaźniaŭ i navat padletkaŭ i dziaciej, jakija tam siadziać z 2020 hoda», — adznačyŭ David Vardanian.

Vardanian patrabuje nieadkładnaha vyzvaleńnia jaho samoha i astatnich armianskich źniavolenych i» svoječasovaha spraviadlivaha i prazrystaha sudovaha razboru ŭ adpaviednaści ź mižnarodna-pravavymi standartami», havorycca ŭ dopisie ŭ fejsbuku.

Vardanian — pradprymalnik i inviestar. Pa vynikach 2021 hoda Forbes aceńvaŭ biznesoŭca ŭ $1 młrd, jon zajmaŭ 116-je miesca ŭ rejtynhu najbahaciejšych rasijskich miljarderaŭ. U vieraśni 2022 hoda jon admoviŭsia ad rasijskaha hramadzianstva i źjechaŭ u Nahorny Karabach, dzie ŭznačaliŭ urad niepryznanaj respubliki. U lutym 2023 hoda jon syšoŭ u adstaŭku, ale zastaŭsia ŭ stalicy niepryznanaj respubliki — Ściepanakiercie.

Jaho zatrymali i aryštavali ŭ vieraśni 2023 hoda pry sprobie vyjechać u Armieniju paśla «antyterarystyčnaj apieracyi» Azierbajdžana ŭ Karabachu, pa vynikach jakoj Respublika spyniła svajo isnavańnie, adtul pačałasia masavaja evakuacyja armian.

Vardaniana abvinavačvajuć u niezakonnym pierasiačeńni miažy Azierbajdžana ŭ vieraśni 2022 hoda, finansavańni teraryzmu, stvareńni i ŭdziele ŭ dziejnaści niezakonnych uzbrojenych farmiravańniaŭ.

• 0
• 0
• 2
• 0
• 1
• 0
• 1
• 0