Tramp patrabuje pa miljardzie dołaraŭ ad krain za pastajannaje členstva ŭ Radzie miru, jakuju jon stvaraje. Staršynioj budzie jon sam
Donald Tramp prapanuje dziaržavam nabyvać pastajannaje miesca ŭ svajoj novaj mižnarodnaj struktury — Radzie miru — za miljard dalaraŭ. Hetaja inicyjatyva ŭžo vyklikała chvalu krytyki va ŭsim śviecie.
Administracyja Trampa raspracavała prajekt statuta novaj arhanizacyi, jakaja, imavierna, zaklikanaja stać alternatyvaj AAN. Zhodna z prajektam, što apynuŭsia ŭ rasparadžeńni Bloomberg, prezident ZŠA płanuje nie tolki asabista ŭznačalić hetuju strukturu, ale i ŭvieści biesprecedentny finansavy cenz dla jaje ŭdzielnikaŭ.
Zhodna z prajektam, zvyčajny termin siabroŭstva ŭ Radzie składzie try hady. Adnak dziaržavy, jakija žadajuć atrymać pastajannaje miesca, pavinny buduć zrabić uniosak u pamiery nie mienš za 1 miljard dołaraŭ najaŭnymi na praciahu pieršaha hoda pracy arhanizacyi. Pradstaŭnik amierykanskaj administracyi paćvierdziŭ hetuju infarmacyju, adznačyŭšy, što sabranyja srodki pojduć naŭprost na adnaŭleńnie siektara Haza.
Statut arhanizacyi nadzialaje Donalda Trampa jak staršyniu praktyčna nieabmiežavanaj uładaj. Choć rašeńni farmalna buduć prymacca bolšaściu hałasoŭ, kožnaje ź ich patrabuje asabistaha zaćviardžeńnia staršynioj. Tramp budzie samastojna vyznačać śpis zaprošanych krain, pryznačać sabie pierajemnika i navat zaćviardžać aficyjnuju piačatku arhanizacyi.
Inicyjatyva ŭžo sustreła žorstki adpor. Premjer-ministr Izraila Bińjamin Nietańjachu zajaviŭ, što płany pa paślavajennym uładkavańni Hazy nie byli ŭzhodnienyja ź jaho krainaj. Jeŭrapiejskija lidary, u svaju čarhu, ličać nieprymalnym toje, što kantrol nad finansami arhanizacyi budzie ŭ rukach adnaho čałavieka. Šerah krain ES rychtuje kalektyŭny pratest suprać stvareńnia hetaj struktury, jakuju mnohija ŭsprymajuć jak sprobu Trampa padarvać aŭtarytet AAN.
Kamientary
pravda eto łoż
svoboda eto rabstvo
Džordž Oruełł