Dalnabojščyk z Bresta za kantrabandu ŭ 3,5 miljonaŭ dalaraŭ sieŭ u turmu ŭ Vialikabrytanii
34‑hadovy dalnabojščyk z Bresta Andrej S. trapiŭ u turmu ŭ Vialikabrytanii za kantrabandu cyharet na sumu kala 3,5 miljonaŭ dalaraŭ. Jon pieravoziŭ tavar u pryčepie, maskiravanym pad zapčastki dla aŭtamabila Bentley, ale hruz nie dajechaŭ da atrymalnika — jaho spynili ŭ porcie Duŭra, piša vydańnie «Pieršy».
Padčas pravierki supracoŭniki pamiežnaj słužby zaŭvažyli padazronuju detal na macavańni numarnoha znaka — kabielnuju ściažku. Heta pryviało da bolš pilnaha ahladu hruzavika, padčas jakoha znajšli sistemu numaroŭ, jakija možna było pierakručvać.
Miechanizm dazvalaŭ mianiać rehistracyjnyja danyja (byli dva kamplekty numaroŭ: polskaha horada Łukava i Varšavy), kab abychodzić kantrol i kamiery videanazirańnia.
U pryčepie znajšli 6 349 800 cyharet roznych marak, dakumienty porta i padroblenyja numary. Ahulnaja škoda brytanskamu biudžetu ad takoj kantrabandy aceńvajecca ŭ sumu kala 2,7 miljona funtaŭ sterlinhaŭ (kala 3,5 miljonaŭ dalaraŭ). U kabinie hruzavika taksama byli paškodžanyja telefon i płanšet (ich sprabavaŭ źniščyć sam kiroŭca), čatyry SIM-karty i tachohraf, a taksama rukapisnaja zapiska z dadatkovym numaram i płomby dla maskiroŭki adtulin. Sudovaja ekśpiertyza paćvierdziła, što adbitki palcaŭ Andreja S. byli na miechaniźmie z numarami, jakija krucilisia.
Razhlad spravy adbyvaŭsia ŭ Karaleŭskim sudzie horada Mejdstana. Sudździa adznačyŭ, što choć asnoŭnaja adkaznaść i lažyć na arhanizatarach schiemy, sam dalnabojščyk taksama dziejničaŭ z matyvaŭ asabistaj karyślivaści. Sproba padčas pravierki hruzu źniščyć srodki suviazi była ŭličanaja jak abciažvalnaja akaličnaść.
Advakat prasiŭ źmiakčyć pakarańnie, adznačajučy, što Andrej raniej nie mieŭ sudzimaściaŭ, jon muž i baćka troch dziaciej, a siamja zastajecca ŭ Biełarusi.
Spačatku Andrej nie pryznaŭ vinu, ale paźniej źmianiŭ pazicyju. 10 studzienia 2026 hoda jaho asudzili na dva hady i siem miesiacaŭ turmy biez prava na abskardžańnie, faktyčna bolš za hod jon praviadzie ŭ źniavoleńni. Paśla vyzvaleńnia jon zastaniecca pad nahladam i moža być vysłany z krainy.
23‑hadovy repier z Astraŭca zahinuŭ za Rasiju na vajnie. Pavajavaŭ jon, vidać, kala miesiaca17
23‑hadovy repier z Astraŭca zahinuŭ za Rasiju na vajnie. Pavajavaŭ jon, vidać, kala miesiaca
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ88
Kamientary