Miljard vybarcaŭ i miljon vybarčych učastkaŭ. U najbujniejšaj u śviecie demakratyi startavali vybary

U vybarach maje prava ŭziać udzieł amal 1 miljard čałaviek. Nasielnictva krainy składaje 1 miljard 439 miljonaŭ čałaviek, u listapadzie 2022 hoda Indyja abahnała Kitaj, nasielnictva jakoha ciapier składaje 1 miljard 425 miljonaŭ čałaviek.

Vyniki buduć abvieščanyja 4 červienia, ale ŭžo jasna, što induisckaja Nacyjanalistyčnaja partyja «Bcharatyja Džanata» (BJP) atrymaje kamfortnuju pieramohu, a 73-hadovy premjer-ministr Narendra Modzi pojdzie na treci termin, piša Bi-bi-si.

Da Modzi tolki adzin čałaviek zmoh tak doŭha pratrymacca la styrna najbujniejšaj demakratyi śvietu — jaje pieršy premjer Džavacharłał Nieru, paplečnik baćki-zasnavalnika niezaležnaj Indyi Machatmy Handzi.

Partyi Modzi supraćstaić raznapłanavy aljans apazicyjnych sił, što da taho ž raździrajecca ŭnutranymi svarkami. Modzi raźličvaje nie tolki zachavać biesprecedentnuju bolšaść u 303 z 543 miescaŭ u nižniaj pałacie parłamienta Indyi, ale i pavialičyć jaho da 370 deputataŭ.

U niekatorych štatach vybary projduć u niekalki etapaŭ.

«My pryniasiem demakratyju ŭ kožny kutok krainy. My abiacajem pravieści vybary tak, kab zastacca majakom demakratyi va ŭsim śviecie», — skazaŭ na pres-kanfierencyi kiraŭnik vybarkama Radžyŭ Kumar.

Jašče da abviaščeńnia daty vybaraŭ Modzi pačaŭ pieradvybarčuju kampaniju. Apošnija miesiacy jon aktyŭna raźjazdžaje pa krainie, adkryvaje sacyjalnyja i pramysłovyja abjekty, razmaŭlaje i molicca z narodam.

Modzi stavić sabie ŭ zasłuhu ekanamičnyja pośpiechi Indyi, jakaja dziakujučy rostu nasielnictva, kvalifikavanaj rabočaj siły i inviestycyj kinuła vyklik susiedniaj KNR jak hałoŭnaj chutkarosłaj ekanomicy śvietu, i stała alternatyŭnaj dla zachodnich kapitałaŭ, što biahuć z kamunistyčnaha Kitaja.

Krytyki Modzi paprakajuć jaho ŭ aŭtarytaryźmie, nacyjanaliźmie i raspalvańni relihijnaj varožaści.

Pravaabarončyja hrupy śćviardžajuć, što za dziesiacihodździe kiravańnia Modzi kolkaść złačynstvaŭ na hlebie nianaviści i aktaŭ hvałtu ŭ dačynieńni da pradstaŭnikoŭ musulmanskaj mienšaści ŭ Indyi ŭzrasła.

Zaniepakojenaść na dniach vykazvaŭ i Viarchoŭny kamisar AAN pa pravach čałavieka Folkier Ciurk.

«Vybary ŭ Indyi buduć unikalnymi pa maštabie. Ja vysoka caniu śvieckija i demakratyčnyja tradycyi krainy i jaje vielizarnuju raznastajnaść, — skazaŭ jon. — Adnak mianie turbuje raspalvańnie nianaviści i dyskryminacyja mienšaściaŭ, asabliva musulman. Mianie turbuje, što prastora dla hramadzianskaj aktyŭnaści zvužajecca, a pravaabaroncy, žurnalisty i krytyki stanoviacca mišeńniu dla ŭłady».

• 7
• 0
• 1
• 1
• 4
• 2
• 1
• 0