Pamiatajecie biełaruskuju supiermadel Marynu Linčuk? Ciapier jana ładzić retryty ŭ Kosta-Rycy ad $5250 za miesca
Minčanka Maryna Linčuk była siarod topavych madelaŭ śvietu ŭ nulavyja. Sioleta biełaruskaja zorka Victoria’s Secret znajšła siabie ŭ novaj pracy.
39‑hadovaja Linčuk apynułasia ŭ madelnaj spravie, kali joj było ŭsiaho 12 hadoŭ. Dziaŭčynka pryjšła na kastynh u ahienctva «Tamara» za kampaniju ź siabroŭkaj, ale vybrali tady jakraz Marynu.
Dalej była praca ŭ madelnych ahienctvach Japonii i ZŠA, a potym i hałoŭnyja podyumy śvietu. U nulavyja Maryna Linčuk niekalki razoŭ była tvaram brendaŭ Dior i Escada, udzielničała ŭ pakazach kalekcyj topavych brendaŭ Chanel, Valentino, Gucci, Roberto Cavalli i šmatlikich inšych. Biełaruska navat dałučyłasia da «aniołaŭ» Victoria's Secret — ciaham niekalkich hadoŭ jana ŭdzielničała ŭ pakazach hetaha kultavaha brenda bializny.
Ź ciaham času dziaŭčyna zacikaviłasia ekałohijaj. Naprykład, u pačatku 2017‑ha Linčuk pajechała na Maldyvy, kab razam z ekałahičnaj arhanizacyjaj Parley ačyščać uźbiarežža ad śmiećcia. Taksama Maryna šmat hadoŭ zachaplajecca johaj i siorfinham.
Ciapier Linčuk žyvie ŭ ZŠA i vychoŭvaje dźviuch dačok razam sa šmathadovym partnioram Brajanam Kiejsi. Madelnuju spravu jana nie zakinuła.
Naprykład, u krasaviku 2026‑ha Linčuk i abiedźvie jaje dački, Hanna-Safija i Džya, źnialisia ŭ rekłamnaj kampanii pra maciarynstva dla suśvietna viadomaha amierykanskaha brenda Michael Kors. Siarod jaje niadaŭniaj pracy taksama zdymki dla luksavaha brenda kaśmietyki dla vałasoŭ Oribe i maładoha modnaha brenda Entire Studios.
Ale ž biełaruska znajšła i inšaje zachapleńnie. Jana vykarystała svaju luboŭ da akijana, johi i siorfinha, i ciapier ładzić luksavyja retryty ŭ Kosta-Rycy prosta na bierazie Cichaha akijana.
Linčuk raspačała svoj biznes u 2025-m. Niekalki hadoŭ tamu joj daviałosia šukać sposab pierazahruzki: jak i mnohich inšych žančyn, Marynu vymatała nieabchodnaść sumiaščać karjeru, maciarynstva i sproby zachavać va ŭsim hetym ułasnuju identyčnaść.
Ciapier Linčuk prapanuje inšym ludziam retryty ŭ Kosta-Rycy jak sprobu pierazahruzicca. Jaje bližejšy retryt adbudziecca na plažy Płaja-Ermosa z 14 da 19 listapada i źbiare, miarkujučy pa inšych retrytach, nie bolš za 10—14 udzielnikaŭ — ci, što bolš vierahodna, udzielnic. Akramia siorfinha, haściej čakajuć joha, piłates, miedytacyja i inšyja pryhody, u tym liku navat viačerni pachod da vadaspada.
Ceny ŭ Linčuk startujuć ad $5250, i za hetyja hrošy možna atrymać łožak u pakoi na dvaich z usimi punktami prahramy. A kali chočacca asobny pakoj, za 6 dzion treba budzie addać $7750. Miarkujučy pa sajcie retrytu, dajechać da Kosta-Ryki i da Kabana, maleńkaha aeraporta niedaloka ad miesca retrytu, treba budzie taksama za svoj košt.
Retryty — zusim nie ŭnikalnaja źjava dla Kosta-Ryki. Naprykład, prosta ciapier možna zareziervavać sabie miesca na siamidzionnym retrycie z padobnaj prahramaj prykładna za $4700.
«Naša Niva» — bastyjon biełaruščyny
PADTRYMAĆCiapier čytajuć
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje18
Kamientary