Dalnaboja z Baranavičaŭ, ciozku pa proźviščy niamieckaj kanclerki, asudzili za «padrychtoŭku da arhanizacyi masavych biesparadkaŭ»
33‑hadovy Arciom Mierkiel jeździŭ na furach u Kitaj i Manholiju, ale rejsy abarvalisia kryminalnaj spravaj.
Arciom Mierkiel naradziŭsia ŭ 1993 hodzie. Jon z Baranavičaŭ.
Chłopiec pačynaŭ u budaŭničaj śfiery: atrymaŭ siaredniuju śpiecyjalnuju adukacyju, pracavaŭ mantažnikam vientylavanych fasadaŭ i zajmaŭsia apracoŭkaj marmuru dy hranitu. Adnak z časam biełarus źviazaŭ svajo žyćcio z aŭtamabilnymi hruzapieravozkami.
Paśla Mierkiel uładkavaŭsia kiroŭcam-mižnarodnikam u Rasii. Arciom vykonvaŭ praciahłyja rejsy pa składanych uschodnich maršrutach: jon rehularna vaziŭ tavary praz rasijskija punkty propusku ŭ Kazachstan, Manholiju i Kitaj.
Zatrymali chłopca ŭ hetym hodzie. Sud Maskoŭskaha rajona Bresta asudziŭ Arcioma Mierkiela pavodle častki 1 artykuła 13 i častki 1 artykuła 293 Kryminalnaha kodeksa — padrychtoŭka da arhanizacyi masavych biesparadkaŭ.
Jamu pahražała ad piaci da piatnaccaci hadoŭ kałonii. Jak i pra bolšaść palityčnych spraŭ, ab sudzie nad kiroŭcam Mierkielem i dakładnym prysudzie ničoha nie viadoma.
UPD. Paśla publikacyi materyjału my atrymali infarmacyju ad čytača, što Arcioma Mierkielu prysudzili siem hadoŭ uzmocnienaha režymu. My nie možam pravieryć hetuju infarmacyju.
Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ.
«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy.
«Naša Niva» — bastyjon biełaruščyny
PADTRYMAĆCiapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj46
Kamientary