ZŠA papiaredzili Jeŭropu, što praz vajnu ź Iranam pastaŭki ŭzbrajeńnia mohuć adkłaści hadoŭ na piać

Hiermanija paprasiła Vašynhton paskoryć pastaŭki dalnabojnych kryłatych rakiet Tomahawk i naziemnych puskavych ustanovak Typhon. Adnak vytvorca rakiet — kampanija Raytheon, jakaja ŭvachodzić u RTX Corp., — naŭrad ci zmoža vykanać niamiecki zakaz najbližejšyja piać hadoŭ praź niedachop rakiet.

Pavodle dvuch čynoŭnikaŭ, z zatrymkami pastavak nieŭzabavie paśla pačatku vajny ZŠA i Izraila suprać Irana sutyknulisia taksama niekatoryja ŭschodniejeŭrapiejskija krainy, jakija vykarystoŭvajuć amierykanskija sistemy ŭzbrajeńnia.

Niedachop amierykanskich zapasaŭ uskładniaje i sproby Ukrainy atrymać dadatkovyja rakiety-pierachopniki dla sistem Patriot napiaredadni čakanaj ciažkaj zimy. Pytańnie pastavak Ukrainie srodkaŭ supraćpavietranaj abarony pavinna stać adnoj z asnoŭnych tem sustreč u AAN u Ńju-Jorku na nastupnym tydni.

Prezident ZŠA Donald Tramp zajaviŭ, što abmiarkoŭvaje z Kijevam mahčymaść pieradačy «značna mienš daskanałaj viersii» Patriot albo vydačy jeŭrapiejskim krainam licenzij na vytvorčaść hetych sistem.

Pavodle źviestak Bloomberg, padčas vajny ź Iranam ZŠA vykarystali bolš za pałovu najbolš sučasnych rakiet Patriot, kala traciny zapasaŭ Tomahawk i amal pałovu vysokadakładnych rakiet i pierachopnikaŭ THAAD. Biudžetnaje ŭpraŭleńnie Kanhresa ZŠA ličyć, što z červienia 2025 hoda amierykanskija vajskoŭcy mahli vydatkavać da dźviuch tracin zapasaŭ rakiet-pierachopnikaŭ.

U Pientahonie pryznali, što vialikaja kolkaść bojeprypasaŭ, vykarystanych suprać Irana ŭ pieršyja miesiacy vajny, pryviała da deficytu stratehičnych zapasaŭ i vyjaviła słabyja miescy amierykanskaj abaronnaj pramysłovaści, jakija pieraškadžajuć chutkamu papaŭnieńniu arsienałaŭ.

Zhodna sa spravazdačaj, apublikavanaj na hetym tydni, Vašynhton ciapier stvaraje zapasy krytyčna važnych kampanientaŭ i asobnych vidaŭ bojeprypasaŭ, a taksama sprabuje skaracić terminy ich vytvorčaści.

Abaronnyja kampanii pavialičvajuć vypusk uzbrajeńniaŭ. Naprykład, Lockheed Martin pracuje nad pavieličeńniem hadavoj vytvorčaści najbolš sučasnych rakiet PAC-3 MSE dla Patriot prykładna z 600 da 2000 adzinak.

Prablemy z pastaŭkami zakranuli nie tolki jeŭrapiejskija krainy. U krasaviku ZŠA papiaredzili Japoniju, što pastaŭki rakiet Tomahawk mohuć zatrymacca na termin da dvuch hadoŭ. Saudaŭskaja Aravija taksama zaklikała sajuźnikaŭ, u tym liku ZŠA, akazać vajennuju dapamohu dla procidziejańnia napadam chusitaŭ u Jemienie. Adnak Vašynhton pakul nie paviedamiŭ, ci budzie davać dadatkovuju padtrymku.

Pry hetym, pavodle krynic Bloomberg, ZŠA praciahvajuć pieradavać Ukrainie ŭzbrajeńnie, jakoje jeŭrapiejskija sajuźniki zakupili ŭ ramkach inicyjatyŭ NATA i Jeŭrasajuza.

Na nastupnym tydni jeŭrapiejskija lidary płanujuć znoŭ paprasić Trampa pieradać Kijevu bolš rakiet Patriot. Pradstaŭniki ES taksama raźličvajuć atrymać ad Vašynhtona dazvoł na vytvorčaść hetych rakiet u jeŭrapiejskich krainach z mahčymaściu ich nastupnaj pieradačy Ukrainie.

• 1
• 1
• 0
• 3
• 1
• 0
• 0
• 0