Minskaja studyja vypuściła dema videahulni, u jakuju možna budzie pahulać pa-biełarusku
U stratehičnym simulatary «Hollywood Animal» padziei buduć razhortvacca ŭ kinaindustryi 1920-ch hadoŭ. Voś što viadoma pra hulniu i jaje raspracoŭščykaŭ.
Postar hulni
Dema-viersija videahulni, jakaja źjaviłasia na płatformie Steam, achoplivaje pieršyja niekalki hadzin stratehii. Jašče letaś była zajaŭlena najaŭnaść biełaruskaj movy ŭ interfejsie i subcitrach hulni, što źjaŭlajecca vyklučnaj redkaściu dla kamiercyjnych praduktaŭ.
Nahadajem, što ŭ «Hollywood Animal» ad studyi Weappy nam daviadziecca pabyvać u škury kiraŭnika kinastudyi i pastavić na nohi «šmatmiljardnaha monstra», jaki budzie znosić usio na svaim šlachu błokbastarami, źniatymi pa formułach.
Ale možna stvaryć i studyju-bucik, pracavać z avanhardnymi režysiorami i zavajoŭvać fiestyvali. Možna pabudavać fabryku trešu, kinuć vyklik «dobramu hustu» i zalić ekrany kryvioj i śliźziu.
Hulec zmoža vieści niačystyja hulni, zaklučać niečakanyja sajuzy, chłusić i zdradžvać, hałoŭnaje — utrymacca na płavu.
Studyja Weappy była zasnavana ŭ Minsku ŭ 2015 hodzie i źjaŭlajecca rezidentam biełaruskaha Parka vysokich technałohij. Razam z zamiežnymi partniorami kampanija stvaraje videahulni, jakija raspaŭsiudžvajucca pa płatnaj madeli dla kampjutaraŭ i sučasnych hulniavych kansolaŭ, takich jak PlayStation 4, Xbox One dy Nintendo Switch.
Z momantu zasnavańnia studyja vypuściła dźvie hulni: u 2016-m na kampjutarach vyjšła «This Is the Police» (u 2017-m taksama na kansolach), u 2018 hodzie jaje praciah — «This Is the Police 2», a ŭ 2019 hodzie — pakrokavaja izamietryčnaja taktyka «Rebel Cops».
U 2021 hodzie studyja Weappy atrymała 1,4 miljona dalaraŭ inviestycyj na raspracoŭku tady jašče nieanansavanaj hulni. Inviestaram vystupiła kampanija GEM Capital, jakaja adznačała, što dziejańni nastupnych hulniaŭ Weappy buduć adbyvacca «pa-za miežami palicejskaha ŭčastka», adnak sam padychod raspracoŭščykaŭ da stvareńnia hulniaŭ i raźvićcia ich suśvietaŭ zastaniecca raniejšym.
«Naša Niva» — bastyjon biełaruščyny
PADTRYMAĆPrapahandysty zapeŭnivajuć, što 196 palitviaźniaŭ užo na svabodzie9
Kamientary