U Iranie zaćvierdžanyja kandydaty na prezidenckich vybarach — piać kansiervataraŭ i adzin refarmatar
U Iranie pačynajecca dvuchtydniovaja pieradvybarnaja kampanija napiaredadni prezidenckich vybaraŭ, daterminova pryznačanych na 28 červienia paśla hibieli prezmdenta Ibrachima Raisi ŭ avijakatastrofie 19 maja, piša Bi-bi-si.
U niadzielu Rada vartavych Isłamskaj revalucyi, Kanstytucyjny orhan, jaki adkazvaje za pravierku kandydataŭ na vybarach, uchvaliŭ kandydaturu śpikiera parłamienta Machamada Bahiera Halibafa i jašče piaciarych čałaviek dla ŭdziełu ŭ vybarach.
Iranskija ŭłady pazbavili bačnych umieranych kandydataŭ prava ŭdzielničać u pazačarhovych prezidenckich vybarach, u vyniku čaho kolkaść kandydataŭ skaraciłasia da piaci prychilnikaŭ žorstkaj linii i adnaho ŭmieranaha refarmista.
Choć najvyšejšym kiraŭnikom Iranskaj dziaržavy źjaŭlajecca nieabirany Viarchoŭny lidar ajatała Ali Chamieniei, prezident — heta druhaja pa značnaści pasada.
Karotki śpis zaćvierdžanych kandydataŭ i ich palityčnyja bijahrafii možna ličyć indykataram taho, što paśla vybaraŭ źmienaŭ u palitycy Tehierana, chutčej za ŭsio, nie adbudziecca.
Da ŭdziełu ŭ vybarach dapuščanyja:
Machamad Bahier Halibaf — śpikier parłamienta, były mer Tehierana i były kamandujučy VPS Korpusa vartavych Isłamskaj revalucyi
Said Džalili — člen Rady pa metazhodnaści, były hałoŭny pieramoŭščyk pa jadziernaj prahramie
Alireza Zakani — mer Tehierana
Masud Piezieškijan — deputat parłamienta
Mastafa Purmachamadzi — były ministr unutranych spraŭ i justycyi
Amir-Chasiejn Hazizade Chašemi — kiraŭnik iranskaha fondu pa spravach pakutnikaŭ i vieteranaŭ
Jak i na papiarednich vybarach, Rada adchiliła bolšaść zajavak — 74. Siarod tych, kaho nie dapuścili da ŭdziełu ŭ vybarach, jość i viadomyja fihury — naprykład, były prezident Machmud Achmadziniežad, jaki zajmaŭ hetuju pasadu z 2005 pa 2013 hod.
Adziny kandydat ad łahiera refarmataraŭ — Masud Piezieškijan, člen parłamienta ad Refarmisckaj partyi.
«Stanoŭčy momant u Piezieškianie — toje, što jon nie supraćstaić ni adnamu z asnoŭnych elemientaŭ ułady ŭ isteblišmiencie. Akramia taho, u jaho vielizarnaja baza padtrymki siarod šmatlikaj Azierbajdžanskaj abščyny na paŭnočnym zachadzie Irana. Ja lohka mahu pradstavić jaho ŭ jakaści nastupnaha prezidenta Irana», — skazaŭ iranski analityk Said Łajłaz u intervju Financial Times.
Kamientary