Jeŭropa pavinna być hatovaja da dziesiaci hadoŭ vajny va Ukrainie — hienieralny sakratar NATA

Na dumku hienieralnaha sakratara NATA Jensa Stołtenbierha, Jeŭropa i NATA pavinny być hatovyja da taho, što vajna va Ukrainie zaciahniecca hadoŭ na dziesiać — ale paradoks situacyi, na jahonuju dumku, palahaje ŭ tym, što čym bolš pierakanaŭča zachodnija sajuźniki buduć demanstravać, što hatovyja da doŭhaj vajny, tym chutčej jana moža skončycca, piša Bi-bi-si.

Adkazvajučy ŭ intervju Bi-bi-si na pytańnie, ci varta krainam NATA być hatovymi da taho, što vajna va Ukrainie zaciahniecca daŭžej čym na dziesiać hadoŭ, Stołtenbierh adkazaŭ: «Tak».

«Ale hałoŭnaje tut toje, što čym macniej my padtrymlivajem Ukrainu i čym daŭžej my hatovyja jaje padtrymlivać, tym chutčej vajna moža skončycca. Paradoks u tym, što prezident Pucin ciapier ličyć, što moža nas pierasiedzieć. Tamu vajna i praciahvajecca», — skazaŭ Jens Stołtenbierh.

«A kali my vielmi jasna dajem zrazumieć, što my tut nadoŭha, što my ćviorda majem namier doŭha dapamahać Ukrainie, tady my stvarajem umovy dla raźviazańnia kanfliktu, pry jakim Ukraina atrymaje pieramohu jak suvierennaja niezaležnaja dziaržava», — praciahnuŭ hienieralny sakratar.

Jens Stołtenbierh prasłužyŭ hienieralnym sakratarom NATA 10 hadoŭ i sydzie z hetaj pasady ŭ kastryčniku hetaha hoda. Jaho źmienić były premjer-ministr Niderłandaŭ Mark Rute.

Stołtenbierh znoŭ zaklikaŭ jeŭrapiejskija krainy NATA pavialičyć asihnavańni na dapamohu Ukrainie. Jeŭrapiejcy i Kijeŭ aścierahajucca, što kali ŭ ZŠA da ŭłady vierniecca Donald Tramp, jon moža zrezać abo zusim spynić finansavańnie dapamohi Ukrainie.

Jens Stołtenbierh upeŭnieny, što ZŠA nie pakinuć NATA Na jaho dumku, mocny aljans — u intaresach samich Złučanych Štataŭ, i bolšaść u abiedźviuch partyjach padtrymlivajuć NATA, što vidać i pa zajavach i dziejańniach kanhresmienaŭ, i pa vynikach apytańniaŭ hramadskaj dumki.

«Niezaležna ad taho, što vy dumajecie pra staŭleńnie ZŠA da NATA, pravilna budzie samim bolš układvać u našu abaronu. Pa-pieršaje, heta pavialičvaje imaviernaść taho, što ZŠA zastanucca našym mocnym sajuźnikam. Pa-druhoje, kali zdarycca niešta vielmi drennaje, to Jeŭropie i Kanadzie nie pieraškodzić mieć na hety vypadak bolš mocnuju abaronu», — dadaŭ hienieralny sakratar NATA.

Stołtenberh pryznaŭ, što raniej Tramp absalutna pravilna i abhruntavana krytykavaŭ jeŭrapiejskija krainy za toje, što jany mała vydatkoŭvajuć na svaje vojski i zanadta zaležać ad ZŠA. Ale ciapier, jak adznačyŭ hienieralny sakratar NATA, situacyja źmianiłasia.

• 2
• 0
• 1
• 0
• 0
• 1
• 0
• 0