Juryj Čyž pajšoŭ u rasijski sud, kab pazmahacca za svoj małakazavod u Hielendžyku
Apalny biznesoviec zdoleŭ na praciahu apošniaha hoda akumulavać zvyš 38% akcyj niadaŭna vyviedzienaj z pracedury bankructva kampanii «Małzavod «Hielendžykski». Ciapier biznesoviec sprabuje praz sudy atrymać kantrol nad pradpryjemstvam, piša «Lusterka».
Jak vynikaje z danych kartateki rasijskich sudoŭ, u kancy minułaha hoda była spynienaja pracedura bankructva AAT «Małzavod «Hielendžykski» i jaho arbitražny kiraŭnik pryznačyŭ ahulny schod akcyjanieraŭ. Siarod tych, chto atrymaŭ zaprašeńnie na hetaje mierapryjemstva, akazalisia 19,16% akcyj pradpryjemstva Juryj Čyž.
Jakim čynam biełarus staŭ akcyjanieram zavoda ŭ Hielendžyku (kurort u Krasnadarskim krai), u dakumientach nie paviedamlajecca.
Ale sa źviestak sudovych orhanaŭ viadoma, što da kastryčnika 2023 hoda biełaruski biznesoviec pavialičyŭ svoj pakiet, vykupiŭšy jašče 19,16% u inšaha biełarusa Iosifa Šeŭčyka. I jak adzin z najbujniejšych akcyjanieraŭ praz sudy pačaŭ patrabavać dostupu ŭ Saviet dyrektaraŭ i da finansavych dakumientach akcyjaniernaha tavarystva.
Jak vynikaje z rašeńniaŭ sudoŭ, častku dakumientaŭ jaho pradstaŭniki zdoleli atrymać. U červieni hetaha hoda Čyž taksama damohsia aryštu bujnoha pakieta akcyj, jakija pierajšli kiraŭnictvu AAT «Małzavod «Hielendžykski» ad adnaho z akcyjanieraŭ.
Čym zajmajecca kampanija, za jakuju zmahajecca biznesoviec?
AAT «Małzavod «Hielendžykski» — adno z najstarejšych pradpryjemstvaŭ horada, zasnavanaje ŭ 1930-ch hadach. Vyrablała da 50 t małaka ŭ sutki i kala 50 vidaŭ pradukcyi, uklučajučy małako, kiefir, kisłamałočnyja pradukty. U 1994 hodzie stała akcyjaniernym tavarystvam. U 2016 hodzie pa zajavie adnaho z kredytoraŭ na im była pačata pracedura bankructva. U kancy 2023 hoda, jak paviedamlali ŚMI, paśla zadavalnieńnia patrabavańniaŭ usich kredytoraŭ arbitražny sud Krasnadarskaha kraju pastanaviŭ spynić spravu.
Adnak, jak vyśvietliła «Lusterka», adradžeńnie zavoda moža akazacca časovym, a sproby Čyža ŭziać pradpryjemstva pad kantrol — biessensoŭnymi. Reč u tym, što ŭ červieni Ministerstva ekanomiki Krasnadarskaha kraju źviarnułasia ŭ krajovy arbitražny sud z zajavaj ab pryznańni pradpryjemstva bankrutam.
***
13 lutaha 2023 hoda sud Centralnaha rajona Minska prysudziŭ Juryja Čyža da 3,5 hoda pazbaŭleńnia voli. Kryminalnaja sprava ŭ dačynieńni da jaho była raspačataja na padstavie zajavy eks-partniora Uładzimira Japryncava. Pa rašeńni suda Čyž byŭ pryznany vinavatym u machlarstvie i lehalizacyi złačynnych dachodaŭ. Ale da jaho ŭžyli amnistyju i zaličyli ŭ termin pakarańnia toj čas, jaki jon užo prabyŭ u źniavoleńni na praciahu sakavika-vieraśnia 2022 hoda.
Paśla hetaha raniejšy blizki siabar Alaksandra Łukašenki pačaŭ adčuvać ciažkaści sa svaim maštabnym biznesam. Finansavyja razborki zakranuli źviazanuju ź im kampaniju «Trajpł», a taksama «Prastormarkiet», jaki naležyć siamji Čyža.
Rašeńnie ab likvidacyi druhoj kampanii, jakaja raźvivała handlovuju sietku ProStore, pryniali ŭ śniežni 2020 hoda na schodzie akcyjanieraŭ. Da taho času firma ŭžo niekalki hadoŭ adčuvała ciažkaści, jakija pačalisia ŭ pieryjad aryštu jaje ŭładalnika Juryja Čyža. Niekatoraja nieruchomaść i aktyvy kampanij pradprymalnika byli vystaŭleny na prodaž. Siarod ich — kafe «Załaty hrabieńčyk», harnałyžny kompleks «Łahojsk».
U mai 2024 hoda stała viadoma, što kampanija «Trajpł», jakaja častkova naležyć biznesoŭcu Juryju Čyžu, bolš nie znachodzicca na miažy bankructva.
Ciapier čytajuć
Za «ekstremisckija» padpiski pry praviercy na miažy bolš nie sadžajuć na sutki11
Za «ekstremisckija» padpiski pry praviercy na miažy bolš nie sadžajuć na sutki
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary