U Rasii z kałonij źnikli niekalki statusnych palitviaźniaŭ. Rychtujecca vialiki abmien?
Źniknieńnie z kałonij adrazu niekalkich palitviaźniaŭ moža aznačać padrychtoŭku da abmienu. Ich mohuć pamianiać na aryštavanych Ukrainaj kałabarantaŭ, havorać pravaabaroncy.
Užo šeść viadomych źniavolenych pa palityčnych spravach vyviezieny ź miescaŭ źniavoleńnia ŭ nieviadomym kirunku. Siońnia stała viadoma ab źniknieńni z kałonii 19-hadovaha Kievina Lika (na fota 1), abvinavačanaha ŭ dziaržzdradzie. Taksama siońnia z kałonii ŭ nieviadomym napramku źjechaŭ palityk Illa Jašyn (fota 2).
Napiaredadni stała viadoma pra źniknieńnie pravaabaroncy Aleha Arłova (fota 3), eks-kiraŭnic štaboŭ Navalnaha va Ufie i Tomsku Lilii Čanyšavaj i Ksienii Fadziejevaj (fota 4 i 5), a taksama mastački Sašy Skačylenki (fota 6). Jaje baćkam skazali, što dziaŭčynu viazuć u Maskvu. Apytanyja telehram-kanałam «Možiem objaśniť» pravaabaroncy dapuskajuć mahčymaść abmienu.
«Vidavočna, što rychtujecca maštabny abmien. Pytańnie ŭ tym, kaho ŭ jaho ŭklučać», — skazaŭ «MO» kiraŭnik pravaabarončaha prajekta «Pieršy adździeł» Ivan Paŭłaŭ.
Pavodle jaho słoŭ, u abmienny fond, chutčej za ŭsio, trapiać amierykanski žurnalist Evan Hierškovič i hramadzianin Hiermanii Ryka Kryhier, pryhavorany da pakarańnia śmierciu ŭ Biełarusi.
«Ja spadziajusia, što ŭ humanitarnych metach buduć padmiešvać i našych palitviaźniaŭ», — dadaje Paŭłaŭ. Jon nie vyklučaje, što heta niejki adciahvajučy manieŭr, a mianiać buduć tolki zamiežnikaŭ.
«Kali ščyra, ja nie razumieju, što adbyvajecca. Spadziajusia na abmien na ŭkrainskich kałabarantaŭ. Ale heta było b cudam», — skazała kiraŭnica fondu «Ruś siadziačaja» Volha Ramanava.
Nie ŭsie mohuć pahadzicca na abmien. Illa Jašyn u adnym sa svaich listoŭ zajaŭlaŭ, što nie hatovy da takoj pracedury: «Abmien dla mianie nieprymalny, pakolki maje na ŭvazie emihracyju».
Apošni masavy palityčny abmien adbyŭsia pry prezidencie Miadźviedzievie. 10 aryštavanych u ZŠA špijonaŭ (u ich liku Hannu Čapman) pamianiali na rasijanaŭ, jakija siadzieli za špijanaž, uklučajučy Siarhieja Skrypala, jakoha paźniej pasprabavali zabić u Łondanie «Piatroŭ» i «Bašyraŭ».
Kamientary