Dziasiatki navukovych supracoŭnikaŭ šukajuć u muziejach Hrodna. Vinavatyja zarobki i ideałahičnaje «sita»

 U asnoŭnym šukajuć małodšych i staršych navukovych supracoŭnikaŭ. Hrodna.life spytała ekśpierta, z čym heta moža być źviazana. Adkaz nie ździviŭ.

Pavialičyć

U Hrodzienskim muziei historyi relihii šukajuć 15 supracoŭnikaŭ. Ź ich šeść — techničnyja, a astatnija — profilnyja. Šukajuć i kiraŭnikoŭ — namieśnika dyrektara pa navukovaj dziejnaści i zahadčykaŭ adździełaŭ. Dla hetaha patrebny staž pracy na kirujučaj pasadzie, profilnaja adukacyja, dośvied pracy ŭ muziei.

Taksama šukajuć mastaka-restaŭratara, muziejnaha nahladčyka, małodšaha navukovaha supracoŭnika.

U Hrodzienskim historyka-archieałahičnym muziei adkryty 17 vakansij. Šukajuć čatyroch muziejnych nahladčykaŭ. Nie chapaje taksama troch staršych navukovych supracoŭnikaŭ, adnaho navukovaha supracoŭnika i siem — małodšych. Zarobak zaležyć ad stažu. Maksimalnaja staŭka — 1100 rubloŭ. Minimalny zarobak — 300 rubloŭ na 0,25 staŭki.

Taksama navukovych supracoŭnikaŭ, ekskursavodaŭ šukajuć u muziei Hrodzienskaj vobłaści.

Navukovy supracoŭnik zajmajecca zboram i daśledavańniem pradmietaŭ u muziei. Toje ž samaje robić na vystavach, a taksama kansultuje naviedvalnikaŭ i viadzie dakumientacyju.

Sychodziać vuzkija śpiecyjalisty

Niekatoryja supracoŭniki sami zvalniajucca z muziejaŭ prosta tamu, što tam mała płaciać. A niekatoryja nie mohuć prajści praź ideałahičnaje «sita» pry sprobie pavyšeńnia. Pra heta Hrodna.life raskazała krynica, blizkaja da muziejnaj spravy ŭ Biełarusi.

Časta zvalniajucca śpiecyjalisty vuzkaha profilu. Naprykład, za apošnija hady historyka-archieałahičny muziej straciŭ zahadčycu adździeła archieałohii Natallu Kiziukievič. Kali prafiesijanał takim čynam vypadaje sa śfiery — to heta ŭžo nadoŭha. «Dumaju, taki čałaviek siabie ŭ Biełarusi ŭ bližejšym časie nie znojdzie», — ličyć surazmoŭca.

Histfak niedachop nie pakryvaje

Zamianić usich, chto zvolniŭsia abo kamu nie praciahnuli kantrakt, vypuskniki Hrodzienskaha dziaržaŭnaha ŭniviersiteta imia Janki Kupały nie zmohuć. «A što ŭ nas ciapier z histfakam? Kolki ŭ nas śpiecyjalistaŭ-historykaŭ rychtujuć uvohule? Ci chacia b nabiarecca paŭtara-dva dziasiatki?» — razvažaje surazmoŭca. Jon źviartaje ŭvahu, što na abjadnanym fakultecie historyi, kamunikacyi i turyzmu zastalisia tolki dźvie ŭłasna histaryčnyja kafiedry z raniejšych čatyroch. Faktyčna, univiersitet rychtuje mała historykaŭ.

«Nie ŭsie, chto skončyŭ historyju, chočuć zajmacca historyjaj. Nie ŭsie razhladajuć pracu ŭ muziejach. Tym bolš za takija nievialikija hrošy», — dadaje surazmoŭca. 1000 rubloŭ dla siońniašniaha Hrodna — nie samaja pryvabnaja zarpłata. Patrabavańniaŭ i kantrolu ŭ biudžetnaj śfiery ciapier usio bolš, a entuzijastaŭ, hatovych pracavać za nievialikija hrošy i dla svajho zadavalnieńnia — usio mienš.

Čamu nie mohuć znajści kiraŭnikoŭ?

Z vakansijami na kiraŭničyja pasady prablemy inšaja — palityčnaja. «Usich, chto pretenduje nie vyšejšuju pazicyju, vielmi praviarajuć pa palityčnuju dobranadziejnaść», — kaža krynica Hrodna.life. Surazmoŭca pierakanany, što prablemy ŭ zakryćci vakansii zamdyrektara mienavita ŭ hetym.

«Muziei, kaniešnie, nie razvalacca», — padsumoŭvaje surazmoŭca. Usio jašče zastajucca entuzijasty, na jakich usio trymajecca i jakich za heta cierpiać i nie zvalniajuć. Ale ŭstanovy buduć dehradavać.

• 0
• 0
• 1
• 1
• 0
• 3
• 3
• 0