U novaha ministra nie tolki pieramohi na spartyŭnych spabornictvach, ale i čatyry vyšejšyja adukacyi.
U Kabiniecie ministraŭ Ukrainy šerah ministerskich partfielaŭ atrymali novyja ludzi. Siarod ich i 44-hadovy Maćviej Biedny, jaki zaniaŭ pasadu ministra sportu i moładzi. Karjera hetaha čałavieka dastatkova admietnaja.
U kancy 1990-ch — pačatku 2000-ch Biedny ŭvachodziŭ u skład zbornaj Ukrainy pa bodzibiłdynhu. U toj čas jon trojčy (2000, 2001 i 2002 hady) stanaviŭsia čempijonam Ukrainy, a ŭ 2000 hodzie vyjhraŭ čempijanat śvietu siarod junijoraŭ u Dubai.
Paralelna sa spartyŭnymi pośpiechami Biedny skončyŭ dva ŭniviersitety, atrymaŭšy dypłom treniera-vykładčyka (2000 hod) i finansavaha mieniedžara (2004 hod).
Šyrokuju viadomaść mužčynu prynios udzieł u 2005 hadach u spartyŭna-zabaŭlalnym šou «Hulni patryjotaŭ», jakoje vychodziła na telekanale «Inter».
Paralelna z nabyćciom papularnaści Biedny zajmaŭsia biznesam, pracavaŭ trenieram i mieniedžaram fitnes-kłuba. A taksama pasprabavaŭ siabie ŭ palitycy, staŭšy (praŭda, tolki na adzin hod) pamočnikam narodnaha deputata. Akramia hetaha, u 2008-m Biedny atrymaŭ dypłom jurysta i praź niekatory čas staŭ pracavać mieniedžaram pa prodažach.
Pieršuju pasadu ŭ dziaržaŭnaj administracyi, hałoŭnaha śpiecyjalista ŭ Ministerstvie moładzi i sportu, Biedny atrymaŭ u 2016 hodzie. U nastupnym hodzie jon pastupiŭ u Akademiju dziaržkiravańnia. U 2020 hodzie Biedny atrymaŭ čaćviorty dypłom ab vyšejšaj adukacyi i pasadu namieśnika ministra. Z vosieni 2023-ha jon vykonvaŭ abaviazki ministra.
Užo jak vykanaŭca abaviazkaŭ ministra sportu Biedny pačaŭ aktyŭna prasoŭvać ideju poŭnaha adchileńnia rasijan ad Alimpijskich hulniaŭ, jakuju, praŭda, realizavać udałosia tolki častkova.
Maćviej Biedny druhi raz žanaty. Ciapier jahonaj žonkaj źjaŭlajecca dačka palityka ad kolišniaj Partyi rehijonaŭ i ŭładalnika mašynabudaŭničaha kancernu «Nikmas» Ryhora Dašucina Viktoryja. Razam jany vychoŭvajuć traich dziaciej.
Cieść Biednaha ŭ 2023 hodzie byŭ aryštavany i abvinavačany ŭ pastaŭkach pradukcyi vajenna-pramysłovamu kompleksu Rasii paśla pačatku vajennaj ahresii.
Ciapier čytajuć
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie26
Kamientary