Pałata pradstaŭnikoŭ u pieršym čytańni pryniała prajekt zakona ab źmienach kodeksaŭ pa pytańniach kryminalnaj adkaznaści

Pałata pradstaŭnikoŭ u pieršym čytańni pryniała prajekt zakona ab źmienach kodeksaŭ pa pytańniach kryminalnaj adkaznaści.

Prajektam prapanujecca zamacavać abmiežavańni dla pakarańnia ŭ vyhladzie pazbaŭleńnia voli — nie pryznačać pazbaŭleńnia voli niepaŭnaletnim, žančynam i adzinokim mužčynam, jakija vychoŭvajuć dziaciej va ŭzroście da 14 hadoŭ abo dziaciej-invalidaŭ, invalidam I hrupy, jakija ŭpieršyniu ŭčynili złačynstva, što nie maje vialikaj hramadskaj niebiaśpieki abo mienš ciažkaje złačynstva, nie spałučanaje z hvałtam, albo pahrozaj jaho prymianieńnia.

Hetaja norma nie budzie adnosicca da tych, chto ździejśniŭ złačynstva «ekstremisckaj nakiravanaści».

Taksama pašyrajecca «koła złačynstvaŭ», za jakija hramadzianie buduć nieści adkaznaść pry ich ździajśnieńni za miežami krainy. U jaje ŭklučany złačynstvy terarystyčnaj nakiravanaści, dyskredytacyja Biełarusi, abraza albo paklop u dačynieńni Łukašenki, ździek ź dziaržsimvałaŭ.

Prapanujucca źmieny pa pytańniach kryminalnaj adkaznaści za narkazłačynstvy — źmiakčeńnie pakarańnia pa častcy 1 artykuła 328 — za kuplu i zachoŭvańnie narkatyčnych i psichatropnych rečyvaŭ. Zhodna ź dziejučym kodeksam hetaja častka artykuła praduhledžvaje abmiežavańnie voli da 2 hadoŭ abo pazbaŭleńnie voli terminam ad 2 da 5 hadoŭ. Zakonaprajekt prapanuje dadać jašče adno pakarańnie — aryšt na termin da troch miesiacaŭ.

U častku 2 artykuła 328 KK — vyrab i zachoŭvańnie narkotykaŭ z metaj zbytu — aŭtary prajekta prapanujuć dadać pakarańnie ŭ vyhladzie abmiežavańnia voli «za razavyja vypadki ich zbytu».

Zhodna z zakonaprajektam, pamianšajecca nižni paroh pakarańnia pa častcy 4 artykuła 328 KK — zbyt narkotykaŭ u składzie arhanizavanaj hrupy. Minimalny paroh u 10 hadoŭ za takoje złačynstva prapanujecca zamianić 8 hadami.

Za niezakonny abarot srodkaŭ płaciažu prapanujecca zachavać kryminalnuju adkaznaść dla tych, chto raspaŭsiudziŭ rekvizity čužych bankaŭskich kart, i ŭvieści administracyjnuju adkaznaść dla tych, chto pradastaviŭ rekvizity svaich ułasnych.

Častka złačynstvaŭ prapanujecca pieravieści ŭ spravy pryvatna-publičnaha abvinavačvańnia — parušeńni praviłaŭ darožnaha ruchu abo ekspłuatacyja transpartnych srodkaŭ, jakija paciahnuli pa nieaściarožnaści pryčynieńnie ciažkaha cialesnaha paškodžańnia i ŭčynienym blizkimi asoby.

Zakon praduhledžvaje ŭniasieńnie źmianieńniaŭ u Kryminalny, Kryminalna-pracesualny, Kryminalna-vykanaŭčy kodeksy, Kodeks ab administracyjnych pravaparušeńniach i Pracesualna-vykanaŭčy kodeks.

• 0
• 0
• 0
• 0
• 0
• 0
• 0
• 0