«Takich čerhaŭ nie było ź leta». Što robicca na biełaruska-polskaj miažy
U Dziaržaŭnym pamiežnym kamitecie paviedamili: ź piatnicy kolkaść lehkavoha transpartu pierad polskim punktam propusku «Tarespal» («Brest») pavialičyłasia na 545 adzinak. «Za vychodnyja dni sumiežny bok pryniaŭ na svaju terytoryju ŭsiaho 34% aŭto ad normy», — adznačajuć u DPK.
Bolš za 1300 lehkavych aŭto, amal 80 aŭtobusaŭ
Čarha na ŭjezd u Polšču pa stanie na 14:00 1365 lehkavych aŭto i 78 aŭtobusaŭ, — raspaviali ŭ pamiežnym viedamstvie.
«Niaznačnaja kolkaść lehkavikoŭ fiksujecca pierad litoŭskimi punktami propusku «Miedniki» («Kamienny Łoh») i «Šalčyninkaj» («Bieniakoni»). Što tyčycca hruzavoha trafiku, to samy zahružany maršrut u ES dla fur prachodzić praź litoŭski punkt propusku «Šalčyninkaj» («Bieniakoni»), piša Onliner.by,
«Kanikuły ŭ škołach paŭpłyvali»
U Breście kažuć, što daŭno nie bačyli takich čerhaŭ na miažy, prynamsi, nie bačyli ź leta. Ale letam — siezon adpačynkaŭ.— Amal 1,5 tys. lehkavych aŭto ŭ elektronnaj čarzie, 75 aŭtobusaŭ było ŭ vychodnyja.
«Ź ciažkaściu takoje ŭzhadvaju. Miarkujučy pa ŭsim, kanikuły ŭ škołach paŭpłyvali», — vykazaŭ mierkavańnie adzin z čytačoŭ.
U čatach, pryśviečanych temie pierasiačeńnia miažy, rehularna źjaŭlajecca infarmacyja pra spaźnieńnie rejsavych aŭtobusaŭ. Aŭtobusy zatrymlivajucca na hadziny z-za praciahłaha čakańnia na miažy, paśla čaho spaźniajucca i na viartańnie z polskich haradoŭ.
Naprykład, pavodle adnaho z paviedamleńniaŭ, aŭtobus pa maršrucie Varšava — Minsk, jaki pavinien byŭ adpravicca z Varšavy 27 kastryčnika ŭ 23:00, budzie vykanany z zatrymkaj — adydzie tolki ŭ 10:30 28 kastryčnika z-za praciahłaha prachodžańnia miažy pamiž Biełaruśsiu i Polščaj. Heta značyć, što zatrymka składała 11 hadzin 30 chvilin.
U toj ža čas u paviedamleńniach amal nie sustrakajucca skarhi na praceduru prachodžańnia miažy i mytny kantrol.
U niekatorych pasažyraŭ praviarajuć bahaž praz renthien: «Siońnia naš aŭtobus pravodzili praz renthien. Makarony, kašy, sałaty ŭ bankach, vada, šakaład, ahurki — ničoha nie zaŭvažyli. Ale paśla pamiežnaha kantrolu stajać śmiećcievyja baki z nadpisami «Małočnyja pradukty», «Sadavina», «Aharodnina».
Niekatoryja pasažyry znachodziać sposaby abyjści doŭhaje čakańnie, pierasadžvajučysia ŭ inšyja aŭtobusy, jakija znachodziacca bližej da pačatku čarhi. Miarkujučy pa infarmacyi z tych ža čataŭ, sproby pierasadžvańnia časam akazvajucca paśpiachovymi.
Naprykład, pasažyr prybyvaje na miažu na adnym aŭtobusie, a zatym idzie ŭzdoŭž čarhi ŭ pošukach miesca ŭ inšym, jaki staić bližej. Časta pierasadka patrabuje dadatkovaj płaty, paraŭnalnaj z koštam poŭnaha bileta na hety ž rejs. Byvali vypadki, kali ŭ čarzie zajmali miescy pustyja aŭtobusy, jakija zatym prymali na bort usich pasažyraŭ niadaŭna prybyŭšaha rejsa, — taki łajfchak vykarystoŭvali niekatoryja pieravozčyki.
Adnak paśla taho, jak situacyjaj zaniałasia Transpartnaja inśpiekcyja, u dačynieńni da pieravozčykaŭ byli pryniaty žorstkija miery i nakładzieny značnyja štrafy. Adkryty prodaž miescaŭ u čarzie spyniŭsia.
Kamientary