Zabyty na dziesiacihodździ antybijotyk moža stać zbrojaj suprać supierbakteryj

Prykładna pałova sučasnych antybijotykaŭ — heta madyfikacyi złučeńniaŭ, vynajdzienych amal sto hadoŭ tamu, u «załatoje stahodździe» adkryćciaŭ u hetaj halinie. Adzin z takich antybijotykaŭ, streptatrycyn, byŭ vydzieleny ŭ 1940-ch hadach i pakazaŭ patencyjał u baraćbie z hramadmoŭnymi bakteryjami, jakija asabliva ciažka paddajucca lačeńniu.

Hramadmoŭnyja bakteryi, u adroźnieńnie ad hramstanoŭčych, nie majuć tryvałaj kletkavaj ścienki, što robić ich lačeńnie składanym. U 2017 hodzie Suśvietnaja arhanizacyja achovy zdaroŭja apublikavała śpis samych niebiaśpiečnych patahienaŭ ź lekavaj ustojlivaściu, bolšaść ź jakich akazalisia hramadmoŭnymi bakteryjami. Pošuk efiektyŭnych alternatyŭ dla baraćby z hetymi patahienami — adna z hałoŭnych zadač farmaceŭtyčnaj industryi.

Streptatrycyn, niahledziačy na jaho antybakteryjalny patencyjał, nie atrymaŭ šyrokaha vykarystańnia z-za taksičnaści dla nyrak, i daśledavańni byli prypynienyja.

Adnak, jak piša Science Aler, navukoŭcy z Harvardskaha ŭniviersiteta vyrašyli adnavić daśledavańni hetaha pryrodnaha antybijotyku, jaki vypracoŭvajecca hlebavymi bakteryjami i ŭjaŭlaje saboj sumieś złučeńniaŭ, takich jak streptatrycyn F (S-F) i streptatrycyn D (S-D).

Daśledavańnie, vyniki jakoha apublikavany ŭ časopisie PLOS Biology, pakazali, što taksičnym efiektam na nyrki vałodaje kampanient S-D, ale hetaha nie adbyvajecca z kampanientam S-F.

U dośledach na myšach S-F paśpiachova źniščyŭ štam bakteryj, jakija nie paddajucca ŭździejańniu mnohich sučasnych preparataŭ, pry taksičnaści, jakaja była minimalnaj ci ŭvohule adsutničała.

Hety vynik adkryvaje mahčymaść stvareńnia novaha pakaleńnia antybijotykaŭ, zdolnych zmahacca z supierbakteryjami.

«Bakteryi, što žyvuć u hlebie, imknučysia abaranić svaju terytoryju, za šmat hadoŭ evalucyi navučylisia stvarać antybijotyki, jakija zdolnyja pranikać praz abaronu hramadmoŭnych bakteryj. Streptatrycyny — adzin z vynikaŭ hetaj «honki ŭzbrajeńniaŭ», jakaja praciahvajecca. Hetyja złučeńni prapanujuć unikalnaje rašeńnie dla praniknieńnia ŭ achoŭnyja miechanizmy hramadmoŭnych uzbudžalnikaŭ», — cytuje vydańnie słovy adnaho z aŭtaraŭ daśledavańnia Džejmsa Kirbi (James Kirby).

Dakładnyja miechanizmy dziejańnia streptatrycynu pakul nie vyśvietleny, ale miarkujecca, što antybijotyk źviazvajecca z hramadmoŭnymi bakteryjami i ŭździejničaje na ich miechanizm sintezu białku nie tak, jak inšyja leki. Kali daśledčykam udasca zrazumieć, jak heta pracuje, jany zmohuć raspracavać zusim novy kłas preparataŭ dla lačeńnia bakteryj, što pakul prajaŭlajuć vysokuju ŭstojlivaść.

• 18
• 0
• 0
• 0
• 0
• 1
• 0
• 1