Aleksijevič raskazała, jak joj prapanavaŭ dapamohu rasijski miljarder Nieŭźlin
«Ad našaj sustrečy zastalisia vielmi dobryja ŭspaminy. Jon vielmi pryhoža pastupiŭ».
U śpiecvypusku TOKu piśmieńnica i nobieleŭskaj łaŭreatka Śviatłana Aleksijevič raskazała pra svaju daŭniuju sustreču ź miljarderam, byłym top-mieniedžaram JUKASa Alaksiejem Nieŭźlinym.
Pa słovach Śviatłany Aleksijevič, jana nie viedała akaličnaściej, źviazanych z padtrymkaj Nieŭźlinym rasijskich resursaŭ, jakija atakujuć Śviatłanu Cichanoŭskuju:
«Ja hetaha nie viedała. Ja viedała tolki, što jon niekamu dapamahaŭ. Ale ź jakoj metaj, ja hetaha nie viedała».
Piśmieńnica adznačyła, što ź Nieŭźlinym jana sustrakałasia tolki adzin raz. Pa jaje słovach, sustreča była vypadkovaj. Nieŭźlin sam vyjšaŭ na piśmieńnicu:
«Ale jon ubačyŭ, što ja nie ŭ stanie [razmaŭlać]. Ja pajšła z sustrečy, pakolki vielmi drenna siabie adčuvała».
«Ad sustrečy ŭ mianie zastalisia vielmi dobryja ŭspaminy. Jon vielmi pryhoža pastupiŭ, kali ŭbačyŭ, nakolki ja chvoraja. Na toj čas ja była ź vielmi vialikim abvastreńniem svajoj chvaroby. Jon dapamoh mnie z daktarami ŭ Izraili. Heta było vielmi pa-čałaviečy», —
dzielicca ŭražańniami nobieleŭskaja łaŭreatka.
«Ja była ŭ takim drennym stanie, što navat nie mahła havaryć. I jon mnie ničoha nie skazaŭ. A potym ludzi ad jaho pazvanili i skazali, što jany apłaciać daktaroŭ, jakija mnie dapamohuć. Sapraŭdy, heta byli charošyja daktary. Jany prapanavali niejkaje lačeńnie. Ale ja nie ryzyknuła. Padumała, što, moža być, nie treba mnie jašče i chirurhičnyja roznyja ŭmiašańni. Moža, mnie dapamohuć tabletki. A inšych kantaktaŭ u mianie nie było», — zhadvaje Aleksijevič i padkreślivaje:
«Absalutna sumlenna zajaŭlaju — inšych kantaktaŭ nie było. A byŭ taki pryhožy čałaviečy kantakt. Mnie spadabałasia, što ŭ jaho taki paryŭ. Jon jak by i nie viedaŭ mianie. Nu, mahčyma, čytaŭ niešta, [jak] jon havaryŭ. Ale ab tym, jak jon potym šukaŭ šlachi upłyvu na paradak dnia ŭ Biełarusi — heta pa-za mnoju».
A ciapier, pa słovach Aleksijevič, Nieŭźlin dałučyŭsia da krytyki piśmieńnicy z nahody jaje vykazvańnia ab uručeńni premii RAW in WAR paleścinskim žurnalistkam (Aleksijevič raskazvała, što nie ŭručała hetu premiju i nie padtrymlivaje CHAMAS).
«Mahli b mnie pazvanić i skazać: «Śviatłana, što adbyłosia?» Ja b raskazała», — zaŭvažaje Aleksijevič.
Hladzicie całkam:
Kamientary
"Ach, obmanuť mienia nie trudno, ja sam obmanyvaťsia rad. "Kultura ž "nie niesiot otvietstviennosti..." Zručna, čamu ž nie!