Navukoŭcy atrymali pieršuju ŭ historyi vyjavu fatona

Navukoŭcy z Univiersiteta Birminhiema ŭ Vialikabrytanii ździejśnili istotny praryŭ u fizicy śviatła, vyznačyŭšy formu adnoj z samych zahadkavych čaścic Suśvietu — fatona. Hetaje adkryćcio stała mahčymym dziakujučy novaj teoryi, jakaja tłumačyć uzajemadziejańnie śviatła z materyjaj na kvantavym uzroŭni.

Forma fatona, jaki ličycca bazavaj čaścicaj śviatła, da hetaha času razhladałasia tolki ŭ tearetyčnym klučy. Akazałasia, što jaho forma i ŭłaścivaści vyznačajucca hieamietryjaj asiarodździa, praź jakoje jon prachodzić, a taksama ŭzajemadziejańniem z rečyvam.

Uličyŭšy paramietry enierhii fatona, častaty jaho chvali, a taksama fizičnych ułaścivaściaŭ materyjału, ź jakim faton uzajemadziejničaŭ (naprykład, ščylnaść ci struktura pavierchni), navukoŭcy dakazali, što forma fatona zaležyć ad struktury asiarodździa, praź jakoje jon prachodzić. Naprykład, u vuzkich hieamietryjach, takich jak nanamateryjały, śviatło moža pavodzić siabie inakš, stvarajučy bolš składanuju formu.
Razam z hetym daśledčyki ŭpieršyniu vyjavili, što bolšaja častka infarmacyi pra formu fatona ŭtrymlivałasia ŭ tym, što navuka tradycyjna ličyła «šumam» (skažeńni, vyklikanyja ŭzajemadziejańniem śviatła z materyjałam) i tamu nikoli hety «šum» nie analizavała.

«Hieamietryja i ŭłaścivaści asiarodździa dakładna vyznačajuć formu, koler i navat samu imaviernaść isnavańnia fatonaŭ u fizičnym stanie», — adznačyli brytanskija navukoŭcy.

Praktyčnyja nastupstvy hetaha adkryćcia vielizarnyja, padkreślivajuć daśledčyki. Novyja danyja mohuć być vykarystany ŭ takich śfierach jak:

• Nanatechnałohii. Atrymańnie dakładnych źviestak pra ŭzajemadziejańnie fatonaŭ ź inšymi abjektami dazvolić navukoŭcam stvarać novyja nanamateryjały. Hetyja materyjały mohuć być užytyja ŭ pryładach, jakija vykarystoŭvajuć śviatło, naprykład, u soniečnych batarejach, śviatłodyjodach abo bijałahičnych sensarach, a taksama ŭ vajskovaj elektronicy, optycy i enierhietycy.

• Kvantavaja suviaź. Faton — klučavaja čaścica ŭ kvantavaj fizicy. Razumieńnie pavodzin fatona i jaho ŭłaścivaściaŭ adkryvaje šlach da stvareńnia bolš efiektyŭnaj i biaśpiečnaj suviazi ŭ śviecie. Naprykład, efiekt kvantavaj zabłytanaści fatonaŭ moža być vykarystany dla pieradačy infarmacyi ŭ kryptahrafičnych sistemach, jakija niemahčyma ŭzłamać.

• Miedycynskaja dyjahnostyka. Dziakujučy vyvučeńniu struktury i pavodzin fatona, možna raspracoŭvać bolš dakładnyja mietady dla vyjaŭleńnia ankałahičnych i inšych ciažkich zachvorvańniaŭ na rańnich stadyjach.

• 8
• 1
• 1
• 2
• 2
• 1
• 0
• 2