Kiraŭnika kryminalnaj milicyi Klimavičaŭ aryštavali za chabar. Pahražaje da 15 hadoŭ
U pačatku 2024 hoda Alaksandr Kucharaŭ atrymaŭ uznaharodu z ruk ministra Ivana Kubrakova. «Historyja pośpiechu ŭ orhanach unutranych spraŭ», — viasnoj chvaliła jaho rajonka. Ale nieŭzabavie Kucharava čakała krutoje pikie — ciapier jon u SIZA pa surjoznym karupcyjnym abvinavačańni.
Alaksandru Kucharavu 44 hady. Jahony syn pajšoŭ pa šlachu baćki i vučycca na trecim kursie Mahiloŭskaha instytuta MUS.
U intervju klimavickaj rajonnaj haziecie «Rodnaja niva» Kucharaŭ raspaviadaŭ, što ŭsio žyćcio maryŭ pracavać u milicyi. Paśla škoły pajšoŭ u armiju, a paśla pastupiŭ u Mahiloŭskuju škołu milicyi.
Kucharaŭ pryjšoŭ na pasadu ŭčastkovaha ŭ 2002 hodzie, u 2009 atrymaŭ pasadu apierupaŭnavažanaha. Pracavaŭ u hrupie narkakantrolu i supraćdziejańnia handlu ludźmi, dajšoŭ tam da staršaha apierupaŭnavažanaha i atrymaŭ zvańnie majora.
Z 2019 pa 2022 pracavaŭ u susiednim Kryčavie načalnikam adździeleńnia kryminalnaha vyšuku.
A ŭrešcie viarnuŭsia ŭ Klimavičy namieśnikam načalnika RAUS. Kucharaŭ uznačalvaŭ u rajonie kryminalnuju milicyju.
Pa vynikach pracy ŭ 2023 jon atrymaŭ padziaku ad Kubrakova z farmuloŭkaj za ŭmiełyja i prafiesijna hramatnyja dziejańni, inicyjavu, prajaŭlenyja pry vykanańni słužbovych zadač.
«Zmahacca sa złačynnaściu — naša praca. Usialakaje zdarałasia, ale dumka pra toje, kab źmianić rod dziejnaści ni razu nie prychodziła. Kalektyŭ u nas zhurtavany, my zładžana vykonvajem pastaŭlenyja zadačy», — chvaliŭsia Kucharaŭ u intervju rajonnaj haziecie.
Nieviadoma, kali kankretna Kucharava zatrymali. Apošniaja publičnaja zhadka jaho imieni zafiksavanaja ŭ sakaviku 2024 hoda. Nieŭzabavie jahonaje imia źnikła z sajta Klimavickaha rajvykankama — ciapier miesca kiraŭnika kryminalnaj milicyi vakantnaje.
Alaksandra Kucharava pačynajuć sudzić 9 śniežnia 2024 hoda ŭ Chocimskim rajonnym sudzie. Heta zvyčajnaja praktyka, kali pracesy nad rajonnymi načalnikami adbyvajucca ŭ susiednich rehijonach — kab źmienšyć imaviernaść karupcyi pry vyniasieńni prysudu.
Kucharava abvinavačvajuć pa treciaj, samaj ciažkaj, častcy artykułu 430 KK — «chabar u asabliva bujnym pamiery abo atrymany asobaj, jakaja zajmaje adkaznaje stanovišča».
Alaksandru Kucharavu pahražaje ad piaci da piatnaccaci hadoŭ sa štrafam i pazbaŭleńniem prava zajmać peŭnyja pasady.
«Naša Niva» — bastyjon biełaruščyny
PADTRYMAĆ
Kamientary