Kiraŭnika škoły Streamline abvinavačvajuć u niezakonnym karystańni padatkovymi lhotami

«Zamiest taho, kab pracavać u pravavym poli, dyrektar kampanii, padajučy svaju dziejnaść jak niekamiercyjnuju, niezakonna karystaŭsia padatkovymi lhotami. Atrymaŭšy zvyš 95 młn rubloŭ vyručki, ułaśnik Streamline za 13 hadoŭ zapłaciŭ mienš za 60 tys. rubloŭ padatkaŭ», — havorycca ŭ siužecie.

Namieśnik načalnika ŭpraŭleńnia DFR Kamiteta dziaržaŭnaha kantrolu pa Minskaj vobłaści i horadzie Minsku Valeryj Ščarbun kamientuje situacyju tak:

«U jakaści asnoŭnaj mety dziejnaści ŭstanovy źjaŭlałasia atrymańnie prybytku. Takim čynam, kampanija faktyčna źjaŭlałasia kamiercyjnaj arhanizacyjaj, i nie mahła karystacca lhotami pa PDV i padatku na prybytak».

Taksama, pavodle jaho słoŭ, atrymanaja vyručka ad akazańnia adukacyjnych pasłuh

«vyvodziłasia na padkantrolnyja ŭłaśniku škoły zamiežnych moŭ kamiercyjnyja subjekty haspadarańnia, u tym liku ŭ vyhladzie pazyk, jakija ŭ dalejšym vykarystoŭvalisia na pradprymalnickija mety».

Suma niavypłačanych padatkaŭ za košt nibyta niepravamiernaha vykarystańnia lhot skłała bolš za 17 młn rubloŭ.

Namieśnik načalnika adździeła ŭpraŭleńnia pracesualnaha kantrolu USK pa horadzie Minsku Juryj Androsik, u svaju čarhu, paviedamiŭ, što ŭ 2012 hodzie kiraŭnik i zasnavalnik škoły razam z žonkaj raspracavali niekalki sposabaŭ vyvadu hrošaj z rachunkaŭ.

«Kampanija stała vydavać biespracentnyja pazyki jak indyvidualnym pradprymalnikam, tak i afilavanaj arhanizacyi, što supiarečyła metam stvareńnia navučalnaha centra. Za 12 hadoŭ ahulnaja suma pazyk skłała bolš za 29 młn rubloŭ», — paviedamiŭ jon.

Ciapier arhanizacyja znachodzicca ŭ stadyi likvidacyi, a ŭ dačynieńni da jaje kiraŭnika i zasnavalnika, jaki znachodzicca za miežami Biełarusi, raspačali kryminalnuju spravu.

Zasnavalnikam i dyrektaram Navučalnaha centra «Adukacyjnyja technałohii», pad ehidaj jakoha pracavali moŭnyja kursy Streamline, źjaŭlajecca Eduard Caluk, jaki raniej davaŭ svoj kamientaryj adnosna hetaj situacyi.

Zapazyčanaść pa zarobkach rabotnikam škoły nibyta zakryli za košt aryštavanych aktyvaŭ kampanii, taksama viarnuli hrošy ludziam, jakija ŭnieśli pieradapłatu za zaniatki ŭ Streamline i nie zmahli ich naviedvać. 

Streamline Language School — najbujniejšaja škoła zamiežnych moŭ u Biełarusi, zasnavanaja ŭ 1998 hodzie, kursy ŭ jakoj prajšli bolš za 100 000 čałaviek. Pra toje, što ŭ škoły źjavilisia prablemy, jaje praca prypyniena, a rachunki zabłakavanyja, stała viadoma ŭ kastryčniku. 

• 0
• 0
• 2
• 0
• 0
• 0
• 0
• 0